Read Mizo_Old_version Sam 27 Bible Online

Sam 27 - Mizo_Old_version bible

Sam 27

¹ LALPA chu ka êng leh mi chhandamtu a ni; tu nge ka ṭih ang? LALPA chu ka nunna kulhbîng a ni; tu nge ka hlauh vang?

²Thil ṭha lo tiho, mi dotute leh ka hmêlmate chuan, ka sa ei tuma mi beih lai khân, An inchhuih a, an tlu ta hlawm a.

³Sipai pâwlhovin mi beih tumin mi ep reng mah sela, Ka thinlung hian a hlau lo vang; Ka chungah indona lo chhuak mah sela, Chuti pawhin ka ring tlat ang.

⁴ LALPA hnênah thil pakhat ka dîl a, chu mawlh chu ka zawng ang; LALPA mawizia hmu tûr leh, a biak ina thu zâwt tûrin, Ka dam chhûng zawnga LALPA ina ka awm reng theihna tûr chu.

⁵Mangan ni chuan a bûktêah mi dah ru dâwn si a, A humhimna puan inah chuan mi thukru ang a; Lungpui chungah mi hlâng kai ang.

⁶Tûnah chuan mi dotu, mi hual vêltute chung lamah ka lu hi chawi kânin a awm ang; Tichuan, a puan inah chuan hlimna inthawinate ka hlân ang a; Ka zai ang, a ni, LALPA fakin ka zai ang.

⁷Aw LALPA, ka awa ka auh che chuan ngaithla ang che; Mi khawngaih la, mi chhâng bawk ang che.

⁸“Ka hmêl zawng rawh u,” tia i sawi lai khân ka thinlung chuan i hnênah, “LALPA, i hmêl ka zawng ang,” a ti a.

⁹Ka lakah hian i hmai thup suh la; I chhiahhlawh hi thinurin tibo suh ang che; Nang chu mi ṭanpuitu i ni ṭhîn a; Aw, mi chhandamtu Pathian, mi paih thla suh la, mi kalsan lul suh ang che.

¹⁰Ka nu leh ka pa chuan mi kalsan ta si a, Nimahsela, LALPA chuan mi la pawm ang.

¹¹Aw LALPA, i kawng chu mi entîr la; Ka hmêlmate avâng hian kalkawng phei takah mi hruai ang che.

¹²Mi dotute duh duha tihah mi pe lul suh ang che; Hretu derten mi bei a, nunchhiat thu chhâk chhuak ṭhîntute chuan.

¹³Mi nung ramah hian LALPA ṭhatna hmuh inring suh ila chuan ka chau tawh tûr a ni.

¹⁴ LALPA chu nghâk reng rawh; Chak takin awm la, i thinlung chu intihuai rawh se; A ni, LALPA chu nghâk reng rawh.