Read Mizo_Old_version Sam 28 Bible Online

Sam 28 - Mizo_Old_version bible

Sam 28

¹Aw LALPA, ka koh dâwn che hi; Ka lungpui, ka lakah i beng chhu ngawng suh ang che; Chuti lo zawng, nangin mi ngawihsan chuan, Khuarkhuruma chhukte ang maiin ka lo awm dah ang e.

²Ka auh chea, ka kutte hi i biakna hmun thianghlim lama ka phar chuan, Khawngaih ka dîlna awte hi ngaithla ang che.

³Mi suaksualte zîngah leh thil tisualtute zîngah chuan mi hnûk bo tel suh ang che; Chûnghote chuan an vêngte hnênah remna thu an sawi ṭhîn a; Nimahsela, an thinlungahte chuan suahsualna a awm reng si a.

⁴An thiltih ang zêl leh, an thiltihte a sualzia ang zêlin rûl la; An kuta an thawh ang zêlin rûl la; An sual man hmuhtîr ang che.

⁵ LALPA hnathawhte leh a kuta a thiltih chu an ngaihsak loh avângin, Ani chuan anniho chu siam ṭha lovin a tichhia ang.

⁶Khawngaih ka dilna awte hi a ngaihthlâk avângin LALPA chu fakin awm rawh se.

⁷ LALPA chu ka chakna leh ka phaw a ni a; Ka thinlung hian amah chu a ring a, tichuan, puihin ka awm a; Chuvângin, ka thinlung hi nasa takin a hlim a; Ka hlain amah ka fak ang.

⁸ LALPA chu an chakna a ni a, A hriakthiha tân chuan chhandamna kulhbîng a ni.

⁹I mite chu chhandam la, i ro chan chu malsâwm ang che; Anniho chu châwm la, kumkhuain pawm ang che.