Read Mizo_Old_version Sam 30 Bible Online

Sam 30 - Mizo_Old_version bible

Sam 30

¹Aw LALPA, ka chawimawi ang che, nangin mi kai chhuak a, Mi dotute chu mi diriamtîr loh avângin.

²Aw LALPA, ka Pathian, Ka au chia, nangin mi tidam ta a.

³Aw LALPA, nangin ka nunna hi Seol ata chu i hruai chhuak a; Khuarkhuruma ka chhuk lohna tûrin nangin mi humhim zêl a.

⁴Aw, a mi thianghlimte u, LALPA fakin zai ula, A hming thianghlim chu fak rawh u.

⁵A thinur chu mit khap kâr chauh a ni si a; A duhsaknaah chuan nunna a awm ṭhîn; Ṭahna hi riak tûrin tlai lamah a lo lût thei a, Zîngah erawh chuan hlimna a lo thleng ṭhîn.

⁶Kei zawngin ka nun khaw nawm lai chuan, “Eng tikah mah ka nghîng lo vang,” ka ti a.

⁷ LALPA, nangin i duhsakna avângin ka tlâng chu i lo din nghehtîr tawh a; Nimahsela, i hmai i thup a, ka lo mangan tâk kha.

⁸Aw LALPA, nang ka au chia; LALPA hnên ngeiah chuan khawngaihna ka dîl kha;

⁹Thi ila, leilâwtah chhuk ila, i tân hlâwkna eng nge awm? Vaivutin a fak dâwn che em ni? I thutak hi a hriattîr dâwn em ni?

¹⁰Aw LALPA, ngaithla la, mi khawngaih ang che; LALPA, nang mi ṭanpuitu ni ang che.

¹¹Ka mitthi ngaihna chu ka tân lâmnaah i chantîr a; Ka saiip puan chu mi hlihsak a, hlimnain ka taiah mi hrêng ta a;

¹²Ka ropuina hi ngawi reng lova, nangmah faka a zaina tûrin. Aw LALPA ka Pathian, kumkhuain lâwm thu ka hrilh fo vang che.