Read Mizo_Old_version Sam 31 Bible Online

Sam 31 - Mizo_Old_version bible

Sam 31

¹Aw LALPA, nangmahah chuan ka rinna ka nghat ṭhîn a; Eng tikah mah mualphovin mi awmtîr suh la, I felna avângin mi chhanhim ang che.

²Ka lamah hian i beng rawn dawh la, mi chhanhim thuai la; Ka tân lungpui nghet tak, mi chhandamna tûra humhimna in lo ni ang che.

³Nang chu ka lungpui leh ka kulhpui i ni si a; Chu vâng chuan, i hming avângin mi hruaiin mi kai ang che.

⁴Ka awh nân a rûka lên an phah lakah hian mi hnûk chhuak ang che; Nang chu ka kulhbîng i ni si a.

⁵I kutah ka thlarau ka kawltîr e; Aw LALPA, thutak Pathian, nangin mi tlan ta.

⁶Thil lawilo mai maite ngaihsakho chu ka hua a; Kei erawh zawngin LALPA ka ring a ni.

⁷I ngilneihna avâng hian ka hlimin ka lâwm ang, Ka manganna hi i hmu si ṭhîn a; Ka nunna hi a hrehawm laite pawhin i hre ṭhîn.

⁸Tin, mi dotu kutah nangin mi khung lo va; Ka ke hi hmun thâwl takah i nghat ta zâwk a.

⁹Aw LALPA, mi khawngaih ang che, mangangin ka awm si a; Ka mit hi lungngaihna avângin a râwp telh telh a, a ni, ka nunna leh ka taksa lamin.

¹⁰Ka dam chhûng hi lungngaiin a ral ta si a, ka kumte hi rûmin a ral ta bawk a ni; Ka khawlohna avângin ka tha a ṭhum a, ka ruhte pawh a râwp zo ta a.

¹¹Mi dotute avângin ka hming hi a lo chhe ta a, A ni, ka vêngte lakah nasa takin a chhe ta a ni, ka hmêlhriatte tân pawh hlauhawm tak ka ni ta; Kawtlaia mi hmute lah khân mi tlânsan ta si a.

¹²Mitthi an theihnghilh ang takin theihnghilhin ka awm a, Bêl keh ang mai ka ni ta.

¹³Mi tam tak mi hêkna ka hre si a, Ka vêla hlauhawm awm chu; Mi phiar ho lai khân, Ka nun mi lâksak an tum a.

¹⁴Nimahsela, aw LALPA, ka ring chia, “Ka Pathian i ni,” ka ti a.

¹⁵Ka hunte chu i kutah a awm a; Mi dotute kut ata leh, mi tiduhdahtute lakah hian mi chhanhim ang che.

¹⁶I hmêlin i chhiahhlawh hi han chhun êng la, I ngilneihna avângin mi chhandam ang che.

¹⁷Aw LALPA, mualphovin mi awmtîr suh ang che, ka ko si chia; Mi suaksualte chu mualphovin awm sela, Seol-ah ngawi rengin awm rawh se.

¹⁸Hmui dawtheite chu ṭawng thei lovin awm rawh se; Chûngte chuan chapo leh hmusit chungin, Ṭawng chaltlai takin mi fel an sawichhe ṭhîn.

¹⁹Aw, i ṭhatna, nangmah ṭihtute tâna i khâwl khâwm chu a va ropui êm! Mihring fate mit hmuha nangmaha rinna nghatte tâna i tihsak chu.

²⁰Anni chu mihring phiarna lakah chuan i humhimna mit hmuhah i thukru ang a, Lei hnialhrâtna lakah chuan bûktêah i dah ru ang.

²¹ LALPA chu fakin awm rawh se, A ngilneihna mak tak chu khawpui nghet takah mi hmuhtîr si a.

²²Kei lah chuan, ka hamhaihin, “I mit hmuh ata paih bovin ka awm ta,” ka lo ti ta mai a; Nimahsela, ka auh che khân, khawngaih ka dîlna awte kha i lo hre si a.

²³Aw, a mi thianghlim zawng zawngte u, LALPA chu hmangaih rawh u; LALPA chuan mi rinawm chu a humhim a, Chapo taka titu chu nasa takin a rûl ṭhîn.

²⁴ LALPA beisei zawng zawngte u, Chak takin awm ula, in thinlung chu intihuai rawh se.