Read Mizo_Old_version Sam 32 Bible Online

Sam 32 - Mizo_Old_version bible

Sam 32

¹A bawhchhiatna ngaihdama awma, A sualna hliahkhuha awma chu, a eng a thâwl e.

²Mi, LALPAN khawlohna neia a ruat lohva, A thlarauva tihderna rêng rêng awm lova chu a eng a thâwl e.

³Ka ngawih reng lai khân, nilênga ka rûm ṭhinna lamah ka ruhte hi a chang zo vek a ni.

⁴A chhûn a zânin i kutin mi delh si a, Ka taksa hnâwnna pawh, ṭhâl rumin thil a tidanglam angin, a lo danglam tâk hial kha. (Selah)

⁵Ka sualna chu i hnênah ka puang a, Ka khawlohna chu ka zêp ta lo va: “Ka bawhchhiatna chu LALPA hnênah thupha ka chawi tawh ang,” ka ti a; Tichuan, ka sual khawlohna chu i lo ngaihdam tâk kha. (Selah)

⁶Chu vâng chuan, Pathian ngaihsak mi tin chu zawn hmuh awla i awm laiin i hnênah ṭawngṭai ṭheuh rawh se; Tui liante chu a lo liam hun chuan anni chu a chîm pha ṭhuai dâwn lo nia.

⁷Nang chu ka bihrûkna hmun i ni a; nang chuan manganna lakah mi humhim ang a; Chhanhimna hlatein mi hual vêltîr ang. (Selah)

⁸Fing taka awmtîr chein i kalna tûr kawng chu ka entîr ang chia; Ka mita en reng chung chein rem ka ruatsak zêl ang che.

⁹Ngaihtuahna nei hlei lo sakawr emaw, sabengtung emaw angin awm suh u; Chûng chuan thunun nân thîrbarh leh hrui an ngai a; Chuti lo chuan, i kiangah an lo kal lo vang.

¹⁰Mi suaksual tân chuan lungngaihna tam tak a awm ang a; LALPA ringtu erawh chu ngilneihnain a hual vêl zâwk ang.

¹¹Mi felte u, LALPA-ah chuan hlimin lâwm ula; Thinlung dik tak pu zawng zawngte u, hlimin au rawh u.