Read Mizo_Old_version Sam 33 Bible Online

Sam 33 - Mizo_Old_version bible

Sam 33

¹Aw, mi felte u, LALPA-ah chuan hlimin zai rawh u! Mi dik tân chuan Pathian fak hi a âwm rêng a ni.

²Ṭingṭangin LALPA hnênah chuan lâwm thu sawi ula, Perhkhuang hrui sâwm nei mi nên amah fakin zai rawh u.

³Amah chawimawiin hla thar sa ula, Thâwm nasa tak nên thiam takin tum rawh u.

⁴ LALPA thu chu a dik a, A thiltih zawng zawng chu rinawm taka tih a ni si ṭhîn a.

⁵Felna leh rorêlna fel hi a ngaina ṭhîn a, Leilung hi LALPA ngilneihnain a khat a.

⁶ LALPA thuin vânte chu siam a ni a; Chûnga awmho zawng zawngte pawh chu a kâa thaw chuan siam an ni bawk a.

⁷Ani chuan tuifinriat tuite chu englo dah khâwm thûr angin a tikhâwm a; Tui thûk takte chu dah khâwmna inahte a dah ṭha ṭhîn.

⁸Leilung luah zawng zawng chuan LALPA chu ṭih sela; Khawvêla awm zawng zawng chu amah hlauvin awm rawh se.

⁹Ani chuan a sawi a, a lo awm ta a; Thu a pe a, a lo awm nghet ta si a.

¹⁰ LALPAN hnam tin remruat chu engmahlovah a chantîr a; Mi tin ngaihtuahte chu eng mah sâwtna nei lovin a siam ṭhîn.

¹¹ LALPA remruat erawh chu kumkhuain a awm nghet ang a, A thinlunga a ngaihtuahte chu chhuan zawng zawng thlengin a awm nghet ang.

¹² LALPA Pathiana neih hnam chu an eng a thâwl e; Ama ro chana a thlan mite chu.

¹³ LALPA chuan vân aṭang khian a thlîr a; Mihring fate zawng zawng hi a hmu ṭhîn.

¹⁴Leia awm zawng zawng hi a awmna hmun aṭang khian a rawn thlîr ṭhîn;

¹⁵An zaa thinlung siam ṭhîna, An thiltih zawng zawng ngaihtuah ṭhîntu chuan.

¹⁶Lal rêng rêng hi sipaiho tam vâng ngawta chhandama awm an awm ngai lo; Mi chak hi chak êm êm vâng ngawtin chhanhim an ni ngai lo.

¹⁷Sakawr hi inchhandam nân eng mah a ni lo va, A chak êm êm avâng maiin tu mah a chhanhim hek lo vang.

¹⁸Ngai teh, LALPA mit chu amah ṭihtute chungah chuan a fu reng ṭhîn a, A ngilneihna beiseitute chungah chuan;

¹⁹An nunna thihna laka chhanhim tûr leh, Ṭâm tlâka anmahni tungnung tûrin.

²⁰Kan nunna hian LALPA a nghâk reng a; Ani chu min ṭanpuitu leh kan phaw a ni.

²¹Amahah chuan kan thinlung hi a hlim dâwn a ni, A hming thianghlim kan rin avângin.

²²Aw LALPA, i ngilneihna chu kan chungah awm rawh se, Kan beisei ang zêl chein.