Read Mizo_Old_version Sam 34 Bible Online

Sam 34 - Mizo_Old_version bible

Sam 34

¹Eng lai pawhin LALPA chu ka fak ang a; Amah fakna chu ka kâah a chhuak fo vang.

²Ka nunna hian LALPA chu a chhuang ang a; Thuhnuairawlhte chuan chu chu an hria ang a, an lâwm ang.

³Aw, LALPA chu mi fakpui ula, A hming chu i chawimawi tlâng ang u.

⁴ LALPA chu ka zawng a; tin, ani chuan mi chhâng a, Ka hlauh zâwng zawng zawng lakah chuan mi chhanhim ta a.

⁵Amah an en a; tin, an lo êng ta a; An hmêlte chu eng tikah mah a zak lo vang.

⁶He mi rethei hi a au va; tin, LALPA chuan a hria a, A manganna zawng zawngah chuan a chhanchhuak ta a.

⁷Amah ṭihtute chu, an vêlah LALPA vântirhkoh chuan a awm chilh a, A chhanhim ṭhîn.

⁸Aw, LALPA ṭhatzia chu tem chhin teh rêng u; Amaha rinna nghat mi chu a eng a thâwl e.

⁹Aw, a mi thianghlimte u, LALPA chu ṭih rawh u! Amah ṭihtute tân chuan tlâkchhamna rêng rêng a awm si lo.

¹⁰Sakeibaknei vânglaite chu an tlachhamin an ril a ṭâm ṭhîn a; LALPA zawngtute erawh chuan thil ṭha rêng rêng an tlachham lo vang.

¹¹Hawh u, naupangte u, ka thu ngaithla rawh u; LALPA ṭih dân ka lo zirtîr ang che u.

¹²Ṭhatna a hmuh theih nâna nunna duha, Dam rei ngaina mi chu tu nge ni?

¹³I lei chu sual lakah vêng ṭha la, I hmui chu tihderna thu sawi lo tûrin vêng ṭha rawh.

¹⁴Sual kalsan la, thil ṭha ti rawh; Remna zawng la, a ûmin ûm rawh.

¹⁵ LALPA mit chuan mi felte lam a en ṭhîn a, A beng chuan an au hre tûrin a ngaithla reng ṭhîn.

¹⁶ LALPA hmêl chuan thil tisualtute chu a do ṭhîn. Anmahni hriat rengna chu lei ata tiboral tûrin.

¹⁷Mi felte chu an au va; tin, LALPA chuan a lo hria a, An manganna zawng zawngah chuan a chhanchhuak ta a.

¹⁸ LALPA chuan thinlunga lungchhiate chu a hnaih ṭhîn a, Rilrua inchhîr apiangte chu a chhandam ṭhîn.

¹⁹Mi fel hrehawmnate chu a tam a; Nimahsela, LALPAN chûng zawng zawngah chuan a chhanchhuak ṭhîn.

²⁰A ruh zawng zawng a vawng ṭha a, Pakhat mah tihtliah a ni lo.

²¹Thil ṭha lovin mi suaksualte chu a tihlum ang a, Mi fel hawtute chuan thiam loh an chang ang.

²² LALPA chuan a chhiahhlawhte nunna chu a tlan ṭhîn a, Amaha rinna nghatte chu pakhat mah thiam loh chang an awm lo vang.