Read Mizo_Old_version Sam 35 Bible Online

Sam 35 - Mizo_Old_version bible

Sam 35

¹Aw LALPA, mi beitute chu nangin bei la; Mi dotute chu nangin do vang che.

²Phaw tê leh phaw lian chelh la, Mi ṭanpui tûrin ding ang che.

³Fei pawh phawi la, mi ûmtute kawng lo dang la; Ka nunna hnênah hian, “I chhandamtu ka ni e,” ti ang che.

⁴Ka nunna tihbo tuma zawngtute chu, tihmualphova tihzahin awm sela; Mi tihchhiatna tûr suangtuahtute chu tlânchhiattîrin, hrilhhai takin awm rawh se.

⁵ LALPA vântirhkohvina khalh zêl siin, Buhsî, thli len angin awm rawh se.

⁶ LALPA vântirhkohvina ûm zêl siin, An kawng chu thim tak leh nâl tak ni rawh se.

⁷A vâng awm lovin mi awh nân an lên chu khuarkhurumah an phah ru a, A vâng awm lovin ka nunna tlâk nân khuarkhurum an lai si a.

⁸A inrin loh hlânin chhiatna a chungah thleng sela; A lên phah rûkah khân amah ngei âwk bawk sela, Chumiah chuan tla chhe rawh se.

⁹Tichuan, ka nunna hi LALPA-ah chuan a hlim ang a; A chhandamnaah chuan a lâwm ang.

¹⁰Ka ruh zawng zawng hian, “LALPA, mi rethei a khin zawh rual loh laka chhanhimtu, A ni, rethei leh pachhia, a ram ṭhîntu laka chhanhimtu, Nang ang rêng rêng tu nge awm?” a ti ang.

¹¹Hretu fel lo takte an lo tho va; Ka thil hriat hauh loh thu-ahte mi chhâl a.

¹²Ka nunnain thil chân khawpin thil ṭha thil sualin mi rûl a.

¹³Kei erawh chuan an damloh laiin saiip puan ka sin a, Chaw ngheia intiretheiin ka ṭawngṭai a; Nimahsela, ka ṭawngṭaina chu chhân lohvin ka hnênah a lo lêt leh a.

¹⁴Keima ṭhian emaw, ka unau ngei emaw chunga ka awm dân tûr ang maiin ka awm a, Mahni nu sûna ṭap ang maiin anmahni sûnin ka kaikûn a.

¹⁵Nimahsela, kei ka bai chuan anni chu an lâwm zâwk a, an inkhâwm hial a; Mi sual mai maite chu mi bei tûrin an inkhâwm a, chu chu ka lo hre si lo va; Bâng duh lovin mi sawisa nek a;

¹⁶Ruai ṭhehnatea nuihza fiamthu sawitute mai mai angin an ha mi ṭhial khum a.

¹⁷ LALPA, nangin eng chen nge i en dâwn le? Ka nunna hi tihchhiat an tumna lakahte chuan chhanchhuak la, Ka neih chhun tak hi sakeibaknei lakahte chuan chhanchhuak ang che.

¹⁸Inkhâwmna ropui takah chuan lâwm thu ka hrilh ang chia, Mi tam tak zîngah ka fak ang che.

¹⁹Ka hmêlmate chuan dik lo takah mi diriam suh se; Enga khaw lawilova mi hawtute chu an mitin inbe hek suh se.

²⁰Remna thu rêng an sawi si lo va, He rama awm hle hlete bumna thute an suangtuah zâwk a ni.

²¹A ni, an kâin mi ân khum huau va, “Chei! Chei! Kan mitin kan hmu ta,” an ti a.

²²Aw LALPA, nangin i hmu e, ngawihsan suh ang che. Aw LALPA, mi hlat lul suh ang che.

²³Ka Pathian leh ka LALPA, ka rorêl tûrin, A ni, ka thua mi ṭan tûrin intiharh la, meng ang che.

²⁴Aw LALPA ka Pathian, i felna avângin ro mi rêl la; Anni chuan mi diriam suh se.

²⁵An rilru chuan, “Chei! Chutiang chu alâwm kan duh ni,” ti suh se; “Ani chu kan lem zo ta,” ti hek suh se.

²⁶Ka chhiatna chunga lâwmte chu mualpho tak leh hrilhhai takin awm hlawm sela; Ka chunga intiliante chu mualphona leh zahna sintîrin awm rawh se.

²⁷Ka felna chunga lâwmte chu hlima auvin lâwm takin awm sela; A ni, “A chhiahhlawh vânneihna chunga lâwm ṭhîn LALPA chu Chawimawiin awm rawh se,” ti fo rawh se.

²⁸Tichuan, ka lei hian felna thu a sawi ang a, I fakna thu pawh nilêngin a sawi bawk ang.