Read Mizo_Old_version Sam 36 Bible Online

Sam 36 - Mizo_Old_version bible

Sam 36

¹Mi suaksual bawhchhiatna chuan ka thinlung chhûngah hian thu a sawi a, “A mit hmuhah Pathian hlauhna rêng rêng a awm lo,” tiin.

²“Ka khawlohna an hmuchhuak lo vang, an haw hlei lo vang e,” tiin, Mahni mit hmuhah mahni vêk a infak chawp si ṭhîn a.

³A kâa thuchhuakte chu sualna leh bumna thu hlîr a ni ṭhîn a; Finvâr leh thil ṭha tih a bâng ta a.

⁴A khumlaizâwlah chuan thil sual a suangtuah ṭhîn a; Kawng ṭha lovah chuan a kal lui a, sualna chu a ten lo.

⁵Aw LALPA, i ngilneihna chu vânahte khian a awm a; I rinawmna chuan vân dumte khi a tawng a ni.

⁶I felna chu Pathian tlângte ang a ni a; I rorêlte chu tui thûk zau tak ang a ni; Aw LALPA, mihring leh sa i humhim ṭhîn.

⁷Aw Pathian, i ngilneihna chu a va hlu êm! Mihring fate chuan i thla hnuai an chuh ṭhîn.

⁸Anni chu i in chhûng thil ṭhain an tlai êm êm ang a; I lâwmna luia mi chu i intîr bawk ang.

⁹Nunna tuikhur chu i hnênah a awm si a; I êngah chuan êng kan la hmu ang.

¹⁰Aw, nangmah hretute chungah chuan i ngilneihna chu lantîr zêl la; Thinlung dik tak pute chungah pawh i felna chu lantîr zêl ang che.

¹¹Chapo ke chu mi bei tûrin ka lamah pên suh sela, Mi suaksual kut pawhin mi hnawt bo suh se.

¹²Sawtah sâwn thil tisualtute chu an tlu reng a; Nam thlûk an ni a, an tho thei tawh lo vang.