Read Mizo_Old_version Sam 38 Bible Online

Sam 38 - Mizo_Old_version bible

Sam 38

¹Aw LALPA, thinurin mi zilhhau suh la, Thinrimin mi thunun hek suh ang che.

²I thalte chu ka pangah a bûr tlat a, I kutin mi nem tlawk tlawk si a.

³I lungnih lohna avângin ka tisaah hian dam lai rêng a awm lo va; Ka sualna avângin ka ruhahte hian hrisêl lai rêng a awm hek lo.

⁴Ka khawlohnate chuan ka lu hi a chîm pil a, Phur rit tak ang, ka zawh rual loh hi a ni.

⁵Ka âtna avângin Ka pemte hi a uihin a khawlo zo ta a.

⁶Ka nâ a, ka kun tlawk tlawk a; Nilêngin lungngaiin ka vân ruai ṭhîn a;

⁷Ka kâwng hi a sa hluah hluah vek a, Ka tisaah pawh hian dam lai rêng a awm lo.

⁸Ka chau va, ka sil ûrh a; Ka thinlung nawm lohna avângin ka rûm vak vak a.

⁹ LALPA, ka duh zâwng zawng zawng hi i hmaah a awm vek a; Ka rûm pawh hi i lakah thuhrûk a ni lo.

¹⁰Ka thin hi a phu hlawp hlawp a, thahrui ka nei ta lo va; Ka mit vârna lah chuan mi awm lohsan ta bawk a.

¹¹Mi hmangaihtute leh ka ṭhiante chu ka thil vei lakah hian an inthiarfihlîm ṭhîn a; Ka laichînte pawh hla takah an ding ṭhîn.

¹²Ka nunna tihbo tuma zawngtute chuan mi awh nân thangte an kam ṭhîn a; Ka chhiatna tûr zawngtute pawh chuan thu ṭha lo takte an sawi a, Nilêngin bumna thute an ngaihtuah ṭhîn.

¹³Nimahsela, kei chu mi bengngawng angin hre lovin ka awm a; Ṭawng thei lo mi, kâ âng ngai lo angin ka awm.

¹⁴A ni, mi ṭawng hre thei lo, A kâa zilhhauna rêng chhuak ngai lo angin ka awm.

¹⁵Aw LALPA, nangmah ka beisei si chia; Aw LALPA ka Pathian, nangin mi chhâng ang.

¹⁶“Chuti lo chuan, mi diriam ang a, Ka ke a tleu veleh ka chungah an intilian dah ang e,” ka ti a ni.

¹⁷Ka bai dâwn dâwn si a, Ka lungngaihna pawh ka hmaah a awm fo a ni.

¹⁸Ka khawlohna chu ka puang ang a; Ka sualna avânga lungngaiin ka awm dâwn a ni.

¹⁹Nimahsela, mi dotute chu an thothâng a ṭhain, an chak a; Dik lo taka mi hawtute chu an pung ta luai a.

²⁰Thil ṭha thil suala rûl ṭhîntute hi Thil ṭha ka ûm avângin mi dotute an ni a.

²¹Aw LALPA, mi kalsan lul suh la; Aw ka Pathian, mi hlat lul suh ang che.

²²Aw LALPA, mi chhandamtu, Mi ṭanpui tûrin hmanhmawh ang che.