Read Mizo_Old_version Sam 39 Bible Online

Sam 39 - Mizo_Old_version bible

Sam 39

¹“Ka lei hian thil ka tihsual lohna tûrin, Ka awm dânte hi ka vêng ṭha ang a; Mi suaksualte ka hmaa an awm chhûng zawng, Ka kâ hi hmui phuarnain ka phuar ang,” ka ti a.

²Chutichuan, ngawi rengin, ṭawng lovin ka awm a, A ṭha lamah pawh ka ngawi reng a; Nimahsela, ka lungngaihna chu chawhthawhin a awm zâwk mah a.

³Ka kawchhûngah hian ka thinlung a sa huam huam a; Ka ngaihtuah ka ngaihtuah chuan mei chu a alh chhuak a; Tin, ka lei hian thu ka sawi ta a:

⁴“LALPA, ka tâwpna tûr leh, ka dam chin tûr chu eng ti nge ni tih mi hriattîr la; Ka derdêpzia hi mi hriattîr ang che.

⁵“Ngai teh, ka dam chhûng hi kutphah bawk lekin i siam a; Ka kum hi i mit hmuhah chuan eng mah tham a ni lo va; Mi tin hi an ṭhat lai ber pawhin an pumin engmahlo mai an ni. (Selah)

⁶Mi tin hi hlim angin an lêng takmeuh va; An buai thlâwn takmeuh ṭhîn a ni; Ro a khâwl khâwm ṭhîn a, a khâwmtu tûr a hre si lo.

⁷“Tin, LALPA, tûnah eng nge ka nghah le? Nangmahah a ni ka beiseina a awm ni.

⁸Ka bawhchhiatna zawng zawng lakah mi chhanchhuak la; Mi â sawichhiatin mi awmtîr suh ang che.

⁹Nangma tih a nih avângin ka ṭawng lo va, ka kâ ka âng hek lo.

¹⁰I mi vuakna hi ka hnên ata mi lâk sawnsak la; I kutthlâka tihboral ka nih hi.

¹¹Mi a bawhchhiatna avânga zilhhaunatea i thunun hian, A duhawmna hi sûlrûl angin i tichhe ṭhîn a; Mi tin hi engmahlo mai an ni. (Selah)

¹²“Aw LALPA, ka ṭawngṭaina hi ngaithla la, ka auhnaah hian beng chhi la; Ka mittui tla hi ngawihsan suh ang che. I mikhual ka ni a, Mi thlahtute zawng zawng ang khân pêm mai ka ni si a.

¹³Aw, heta ta ka chhuaha, ka awm loh hlen daih hma hian, Ka harh lehna tûrin mi zuah ang che.”