Read Mizo_Old_version Sam 41 Bible Online

Sam 41 - Mizo_Old_version bible

Sam 41

¹Retheite ngaihtuah mi chu a eng a thâwl e, Mangan ni chuan LALPAN ani chu a chhanhim ang.

² LALPAN ani chu humhimin a tinung ang a, leiah hian malsâwmin a awm ang; Amah dotute duh duha tihah pe suh ang che.

³ LALPAN a chauhna mut hmunah chuan a tichak ang a; Nangin a damloh laiin a mutna i siamsak vek ṭhîn.

⁴Keiin, “Aw LALPA, mi khawngaih la, Ka nunna hi tidam ang che, i chungah thil ka tisual si a,” ka ti a.

⁵Mi dotute chuan, “Eng tikah nge a thih ang a, a hming a bo vang?” tiin, Mi sawichhe ṭhîn a.

⁶Tin, an zînga tuin emaw mi rawn kan lahin, thu engmahlo mai mai a sawi ṭhîn a; A thinlung chuan sualna a la khâwm ṭhîn a; A kal chhuah veleh mi a hrilh ṭhîn.

⁷Mi hawtute zawng zawng chuan mi hêkna thu sêsêin an la a; Mi tihchhiatna tûr an suangtuah ṭhîn.

⁸“Natna ṭha lo takin a tlâkbuak ta a; Tûna a mu hi a tho leh tawh lo vang,” an ti a.

⁹A ni, ka ṭhian kawmngeih, ka rin tak, Ka chhang eipui ngei chuan a keartui ka chungah a lek ta.

¹⁰Nimahsela, aw LALPA, nangin mi khawngaih la, Anmahni ka thungrulh theihna tûrin mi kaitho leh ang che.

¹¹Hemiah hian ka chungah i lâwm tih ka hria, Mi dotu chuan mi ngam ṭhin loh avâng hian.

¹²Kei zawng rilru ṭha tak ka putnaah hian nangin mi chelh reng a, A hmaah chuan kumkhua atân mi dah a.

¹³ LALPA, Israela Pathian chu, Chatuan ata chatuan thlengin fakin awm rawh se. Amen. Amen.