Read Mizo_Old_version Sam 42 Bible Online

Sam 42 - Mizo_Old_version bible

Sam 42

¹Sakhi, luite tui châka a thaw huam huam ang hian, Aw Pathian, ka nunna hi nangmah châkin a thaw huam huam a ni.

²Ka nunna hi Pathian châkin, Pathian nung châkin a tuihâl a ni. Eng tikah nge Pathian hma ka thlen anga, ka inlan ang aw?

³Ka mittui hi a chhûn a zânin ka chaw a ni. “Khawiah nge i Pathian le?” mi lo ti châmchi a.

⁴Hêng thil hi ka hre reng a, ka nunna hi ka chhûngah ka leihbua a, Mipui zînga ka kala, hlimna leh fakna ri nêna mi tam tak kût, Pathian biak in pana an hma ka hruai ṭhinziate kha.

⁵Aw ka nunna, engah nge i kun reng? Engah nge ka chhûngah hian i buai ni? Pathian beisei rawh; a hmêla damna avângin amah chu ka la fak dâwn si a.

⁶Aw ka Pathian, ka nunna hi ka chhûngah hian a kun reng a; Chuvângin, Jordan leh Hermon ram aṭang te, Mizar tlâng aṭang te hian ka hre reng che a ni.

⁷I tui luang ri dur durahte hian tui thûk leh tui thûk chu an inau va; I tuifâwn leh i tui inchhawk zawng zawngte chuan mi vûr pil ta a.

⁸Nimahsela, LALPAN a ngilneihna chu chhûnah thu a pe ang a, A hla chuan zânah mi awmpui ang, Ka nunna Pathian hnêna ṭawngṭaina chuan.

⁹Pathian, ka lungpui hnênah chuan, “Engah nge mi theihnghilh le? Engah nge dotu hnehchhiahna avânga lungngaia ka vân ruai ṭhin le?” ka ti ang.

¹⁰Ka ruha khandaih awm ang maiin mi dotute chuan mi sawichhe ṭhîn a; “Khawiah nge i Pathian le?” mi lo ti châmchi a.

¹¹Aw ka nunna, engah nge i kun reng? Engah nge ka chhûngah hian i buai ni? Pathian beisei rawh; amah chu ka la fak dâwn si a, Ka hmêl tidamtu leh ka Pathian chu.