Read Mizo_Old_version Sam 44 Bible Online

Sam 44 - Mizo_Old_version bible

Sam 44

¹Aw Pathian, hmasânga an dam laia i thiltihte kha Kan thlahtuten min hrilh, kan bengin kan hria.

²Nangin i kut ngeiin hnam tin chu i hnawt chhuak a, anni chu i phun ta thung a; Mi tin chu i tirethei a, anni chu i zâr zautîr ta thung a.

³Ram hi luah tûra anmahni khandaiha an lâk a ni lo va, Anmahni bâna inchhandam an ni hek lo; An chunga i lâwm avângin I kut ding lam leh, i bân leh, i hmêl êngin a ni zâwk.

⁴Aw Pathian, nang chu ka Lal i ni; Jakoba chhanhim nân thu pe ang che.

⁵Nangmah avângin min dotute chu kan si thlu ang a; I hming avângin min beitute chu kan chîl nek ang.

⁶Ka thal ngul hi ka ring dâwn si lo va, Ka khandaih hian mi chhandam hek lo vang.

⁷Mi dotute lakah chuan nangin min chhandam ta zâwk a, Min hawtute chu i timualpho ta bawk.

⁸Nilêngin Pathian kan chhuang a, I hming chu kumkhuain kan fak bawk ang. (Selah)

⁹Tûnah erawh chuan nangin min thlauthla a, min tizak a; Kan sipaiho hnênah lah i chhuak ve ta ngai lo va.

¹⁰Dotute lakah chuan min tlânchhiattîr ṭhîn a, Min hawtute chuan sum chu an duh duh an la ṭhîn.

¹¹Berâm talh tûr angin min dah a, Hnam tin zîngah min tidarh bawk a.

¹²I mite hi engmahlovah i hralh a, An man chu i hausakpui chuang si lo.

¹³Nangin kan vêla mite sawichhiatin min awmtîr a, Kan dep vêla mite hmuhsit leh nuihsanin min awmtîr bawk a.

¹⁴Nangin hnam tin zîngah a chhe lam tehkhinnaah min awmtîr a, Mi tin zînga mite lu thinsanin min awmtîr bawk a.

¹⁵Ka zahna hi nilêngin ka hmaah a awm ṭhîn a, Ka mualphona hian mi khuh zo ta,

¹⁶Sawihnâwmtu leh sawichhetu aw avâng leh, Hmêlma leh phuba latu avângin.

¹⁷Chûng zawng zawng chu kan chungah a thleng a; Nimahsela, kan theihnghilh ngai lo chia, I thuthlungah hian a derin kan ti ngai hek lo.

¹⁸Kan thinlung hi a hawi kîr lo va, Kan ke pênte hian i kawng chu a pênsan ngai hek lo.

¹⁹Nangin sihalte awmnaah min sawisak neka, Thihna daihlima min khuhna tûr hian.

²⁰Kan Pathian hming kan theihnghilh emaw, Ram dang pathian lama kan kutte kan phar emaw chuan,

²¹Pathianin chu chu a zawng chhuak lo vang em ni? Thinlunga thurûkte hi a hre reng si a.

²²A ni, nangmah avângin nilêngin thahin kan awm ṭhîn; Berâm talh tûrte anga ngaih kan ni.

²³Aw LALPA, harh ta che, engah nge i muthilh ni? Meng la, kumkhua chuan min thlauthla suh ang che.

²⁴Eng vângin nge i hmai i thupa, Kan hrehawmzia leh hnehchhiah kan tuarzia hi i theihnghilh ṭhin ni?

²⁵Kan nunna hi vaivut siin a kûn a; Kan pum lah leiah a bet tlat si a.

²⁶Min ṭanpui tûrin tho la, I ngilneihna avângin min tlan ang che.