Read Mizo_Old_version Sam 45 Bible Online

Sam 45 - Mizo_Old_version bible

Sam 45

¹Ka thinlung hi thil ṭhain a liam zawih zawih a; Lalber chungchâng thua ka thil phuah chu ka sawi dâwn e; Ka lei hi lehkha ziak thiam tak kawlawm a ni.

²Mihring fate ai hian i hmêl a ṭha zâwk a; Khawngaihna hi i hmuiah leih a ni; Chuvângin, Pathianin kumkhua atân mal a sâwm che a ni.

³Aw, mi chak, i khandaih chu i kâwngah vawng rawh, I ropuina leh i mawina nên.

⁴Thutak leh thuhnuairawlhna leh felna avângin, I mawina inbelin hmuingîl takin sakawr chunga chuangin kal zêl ang che; Tichuan, i kut ding lamin thil râpthlâk takte a zirtîr dâwn che nia.

⁵I thal chu a zum a, Lalber dotute thinlungah chuan a bûr reng a; Mi tin chu i hnuaiah an tlu ṭhîn.

⁶Aw Pathian, i lalṭhutphah chu chatuanin a awm tûr a ni; Thlei bîk neih lohna lal tiang chu i ram lal tiang chu a ni.

⁷Felna chu i ngaina a, suahsualna chu i huat kha; Chuvângin, Pathian, i Pathian chuan, i ṭhiante aia nasain hlimna hriak a thih tâk che hi.

⁸I silhfên zawng zawng chu murra rim te, aloe rim te, thakthîng rim te a nam rum rum a; Sainghova siam lal intea ṭingṭang chi hrang hrang ri lo chhuakte chuan a tihlim che a nih hi.

⁹I hmeichhe ṭhate zîngah chuan lalho fanute an tel ve a; I ding lamah chuan Ophir rangkachaka incheiin lalnu chu a ding a.

¹⁰Aw ka fanu, ngaithla la, ngaihtuah la, beng chhi rawh; I mite leh i pa ina mite chu theihnghilh rawh;

¹¹Chutichuan, lalberin i hmêl ṭha tak hi a duh dâwn nia; Ani chu i LALPA a ni si a; tichuan, amah chu chibai bûk ṭhîn ang che.

¹²Tura fanu chu thilpêk kengin chutah chuan a awm ang a; Mi zînga hausate ngei chuan i khawngaihna an ngên ang.

¹³Lal in chhûnga lal fanu chu a ropui vêl vek a; A silhfên chu rangkachaka zeh mawi a ni.

¹⁴Puan ṭhui mawi sinin lalber hnênah an hruai ang a; Amah zuitu, a ṭhian nulahote chu I hnênah an hruai ang.

¹⁵Lâwm tak leh hlim takin an hruai ang a; Lalber inah chuan an lût ang.

¹⁶I pate aiah i fate an awm ang a, Anni chu lei chung zawng zawngah hian mi lianah i siam ang.

¹⁷I hming hi chhuan zawng zawngah hian hriat reng tûrin ka siam ang a; Tichuan, mi tinin kumkhaw tlaitluanin lâwm thu an hrilh ang che.