Read Mizo_Old_version Sam 46 Bible Online

Sam 46 - Mizo_Old_version bible

Sam 46

¹Pathian chu kan inhumhimna leh kan chakna, Mangan laia ṭanpui vartu hnai reng a ni.

²Chuvângin, leilung hi lo danglamin, Tlângte hi tuifinriat chhûng daihah insawn mah sela, kan hlau lo vang;

³A tuite chu ri hum humin phûl bulh bulh mah sela, A fâwn nasat avângin tlângte hi nghîng dur dur mah sela, kan hlau chuang hek lo vang. (Selah)

⁴Lui pakhat a awm a, chumi pêngte chuan Pathian khawpui chu a tilâwm ṭhîn, Chungnungbera awmna hmun thianghlim chu.

⁵Pathian chu a lai takah a awm a, a nghîng lo vang a; Pathianin khawfîngchah hunah chuan a ṭanpui ang.

⁶Hnam tin an ri hum hum a, ramte chu a nghîng a; Ani chuan a aw a chhuah a, leilung hi a lo tui zo ta a.

⁷Sipaihote LALPA chu kan hnênah a awm a; Jakoba Pathian chu kan kulhbîng sâng a ni. (Selah)

⁸Hawh u, LALPA thiltihte hi en rawh u, Leilunga thil a tihchhiatziate hi.

⁹Ani chuan indonate chu kâwlkil thlengin a tireh ṭhîn a; Thal ngul chu a titliak a, fei chu a sât bung ṭhîn a; Tawlailîrte chu meiah a rawh ral ṭhîn.

¹⁰Ngawi ula, Pathian ka ni tih hi hre rawh u: Hnam tin zîngah chawimawiin ka awm ang a, leiah hian chawimawiin ka awm ang.

¹¹Sipaihote LALPA chu kan hnênah a awm a; Jakoba Pathian chu kan kulhbîng sâng a ni. (Selah)