Read Mizo_Old_version Sam 49 Bible Online

Sam 49 - Mizo_Old_version bible

Sam 49

¹Mi tinrêngte u, hei hi ngaithla ula; Khawvêla awm zawng zawngte u, beng lo chhi rawh u,

²Mi tê leh mi lian, Mi hausa leh mi rethei pawhin.

³Ka kâ hian finna thu a sawi ang a; Ka thinlung ngaihtuah chu hriat thiamna thu a ni ang.

⁴Tehkhin thu-ah ka beng ka chhî ang a; Ka thu ril sawi chu ṭingṭangin ka hrilhfiah ang.

⁵Ni ṭha lovahte ka keartui bula khawlohna chuan mi hual vêl pawhin, Engah nge ka hlauh vang?

⁶Mahni sum ringa, Mahni hausakna nasa tak chhuangtute chuan,

⁷Tu mân an unau pawh an tlan thei tawp lo vang a, Pathian hnênah tlanna an pêksak thei hek lo vang

⁸(An nun tlanna tûr chuan thil nasa tak sên tûr a ni a, Kumkhua pawha a tina tin loh mai tûr a ni):

⁹A dam reng fo va, Ṭawihna a hmuh lohna tûr chuan.

¹⁰Mi fingte pawh an thi a, Mi â leh mi mâwlte pawh an boral ve ve a, An sum mi dangte an hnutchhiah ṭhinte chu a hre si a.

¹¹An rilru ngaihtuah dân chu, An inte chu kumkhuaa awm tûr ang leh, An awmnate chu chhuan zawng zawng thlenga awm tûr angin a ni; An ramte chu anmahni hming vêk an puttîr ṭhîn.

¹²Nimahsela, mihring hi chawimawiin an awm reng lo va; Sa boral ṭhînte ang mai hi an ni e.

¹³Chûng an awm dân chu an âtna a ni; Nimahsela, an hnuah chuan miten an thusawite chu ṭha an ti ṭhîn. (Selah)

¹⁴Berâm rual angin Seol tân ruat an ni a, Thihna chu an vêngtu a ni ang; Khua a vârin mi felten an chungah ro an rêl ang a; An taksa a ral ang a, Seol chu an chênna in tûr a ni.

¹⁵Ka nunna erawh chu Pathianin Seol kut ata a tlan chhuak ang; Ani chuan mi lâwm dâwn si a. (Selah)

¹⁶Mi tihhausaka a lo awma, A chhûngkaw ropuina chu a lo nasat tulh tulh pawhin, hlau suh ang che;

¹⁷A thih hunah chuan eng mah a chhawm dâwn lo va; A ropuina chuan a zui thla dâwn si lo.

¹⁸A dam laiin intiengthâwl mah sela (A hlawhtlin avângin miin fak ṭhîn mah se),

¹⁹A thlahtute chhuan hnênah a kal ang; Eng tikah mah êng hmu tawh lo tûrte hnênah chuan.

²⁰Mihring, chawimawia awma, hriat thiamna nei si lo chu, Sa boral ṭhînte ang mai hi an ni.