Read Mizo_Old_version Sam 5 Bible Online

Sam 5 - Mizo_Old_version bible

Sam 5

¹Aw LALPA, ka thu-ah hian beng lo chhi la, Ka ngaihtuahna hi ngaihtuah ang che.

²Ka Lal leh ka Pathian, Ka au thâwm hi ngaithla ang che, I hnêna ṭawngṭai ka ni si a.

³Aw LALPA, zîngah chuan ka aw hi i lo hre ṭhîn ang a; Zîngah chuan ka ṭawngṭaina hi i hmaan ka rêl fel diam ang a, Ka lo ngaihven ṭhîn ang.

⁴Suahsualnaa lâwm ṭhîn Pathian i ni si lo va; Mi sual chu i hnênah an thleng lo vang.

⁵Mi uangthuangte chu i mit hmuhah an ding thei lo vang a; Thil tisualtute zawng zawng chu i haw ṭhîn.

⁶Dâwt thu sawi hmangte chu i tiboral ang a; LALPAN thisen chhuah hmang leh bum hmang mi chu a ten riau ṭhîn.

⁷Kei erawh chu, i ngilneihna nasa tak avângin, i inah ka lo lût ang a; Ṭih chung chein i biak in thianghlim lam hawiin chibai ka bûk ṭhîn ang che.

⁸Aw LALPA, ka hmêlmate avâng hian i felna avâng chuan mi hruai la; I kawng chu ka hmaah hian titluang ang che.

⁹An kâah chuan rinawmna rêng rêng a awm lo va; An kawchhûng chu suahsualna hlîr a ni; An hrawk chu thlân inhawng a ni a; An leiin mi an fak der ṭhîn.

¹⁰Aw Pathian, anniho hi thiam loh chantîr ang che; Anmahni remruat ngeite chu tlûk phah nân hmang rawh se: An bawhchhiatna tam tak avâng hian nam chhuak ang che; I chungah an hel si a.

¹¹Nangmaha an rinna nghat zawng zawngte erawh chu nangmahah chuan lâwm sela, I hum ṭhin avângin hlimin au kumkhua hlawm rawh se; I hming ngainate pawh chu nangmahah chuan lâwm takin awm rawh se.

¹²Mi fel chu mal i sâwm dâwn si a; Aw LALPA, ani chu phaw ang hian duhsaknain i hual vêl ang.