Read Mizo_Old_version Sam 50 Bible Online

Sam 50 - Mizo_Old_version bible

Sam 50

¹Pathian, Pathian ngei, LALPA chuan thu a sawi a, Leilung hi ni chhuahna aṭanga a tlâkna thlengin a ko ta.

²Mawi famkimna, Zion aṭang chuan, Pathian chu a êng chhuak ta a.

³Kan Pathian chu a lo kal ang a, a ngawi reng lo vang: A hma lamah chuan mei a kâng hluah hluah ang a, A vêlah chuan thlipui nasa tak a tleh bawk ang.

⁴A mite ro a rêl theihna tûrin Chung lam vânte leh lei hi a ko vang,

⁵“Ka mi thianghlimte ka hnênah rawn hruai khâwm rawh u, Sa talha ka hnêna thu thlungtute chu,” tiin.

⁶Tichuan, vânte khian a felna chu a tlangaupui ang, Amah Pathian ngei chu rorêltu a ni si a. (Selah)

⁷“Aw ka mite u, ngaithla rawh u, thu ka sawi dâwn e; Aw Israel, ngaithla rawh, ka hriat fiahtîr dâwn a che: Kei hi Pathian, i Pathian ngei chu ka nih hi.

⁸I inthawinate avângin ka zilhhau lo vang che; I hâlral thilhlante chu ka hmaah a awm chawt si a.

⁹I in ata chu bâwngpa rêng rêng ka la chhuak lo vang a, I ran huang ata kêlpate pawh ka la chhuak hek lo vang.

¹⁰Ramhnuaia sa tinrêngte hi ka ta a ni si a, Tlâng sângkhat lai chunga ran awmte pawh chu.

¹¹Tlânga sava zawng zawng ka hre vek a, Ramsate pawh hi ka ta a ni.

¹²“Rilṭâm mah ila ka hrilh lo vang che; Leilung leh a chhûnga thil awm zawng zawng hi ka ta a ni si a.

¹³Bâwngpa sa ka eiin kêl thisen ka in dâwn em ni?

¹⁴Pathian hnênah lâwm thu sawi inthawina chu hlân zâwk la; I thutiam pawh Chungnungbera lakah hlen rawh.

¹⁵Tin, mangan niah chuan mi ko la; Ka chhanhim ang che; tichuan, nangin mi chawimawi dâwn nia,” a ti a.

¹⁶Mi suaksual hnênah erawh chuan Pathianin, “Ka thuruat hi engtiziaa hriattîra, Ka thuthlung hi engtiziaa i kâa lam ngun nge i nih?

¹⁷Thunun i hua a, Ka thute hi hnung lamah i paih zêl si a.

¹⁸Rûkru i hmuhin rem i tihpui a, Uirepate lah i kawppui bawk ṭhîn.

¹⁹“I kâ hi sual i pe a, I lei hian bumna a siam bawk ṭhîn.

²⁰Ṭhu chungin i unau i sawisêl a; Mahni nute fapa ngei chu i hêk ṭhîn.

²¹Chûng thil chu i ti a; nimahsela, ka ngawi reng a; Chutichuan, nangmah ang diakah mi ruat ṭhîn; Nimahsela, ka zilhhau ang chia, i mit hmuhah indawt zêlin ka tilang ang.

²²“Nangni Pathian theihnghilhtute u, hei hi ngaihtuah rawh u khai! Chuti lo chuan, ka pawt sawm dah ang che u, Nangmahni chhanhimtu rêng an awm dâwn si lo.

²³Tu pawh lâwm thu sawi inthawina hlân apiang chuan mi chawimawi ṭhîn a; Tin, a awm dân vawng ûptu hnênah chuan, Pathian chhandamna ka entîr ang,” a ti a.