Read Mizo_Old_version Sam 51 Bible Online

Sam 51 - Mizo_Old_version bible

Sam 51

¹Aw Pathian, i ngilneih êm avângin mi khawngaih la; I lainatna nasat avângin ka bawhchhiatnate hi thai bo vang che.

²Ka khawlohnate hi mi sil faisak var la, Ka sual hi mi tlen faisak ang che.

³Ka bawhchhiatnate hi ka hre ta si a, Ka sual hi ka hmaah a awm fo ṭhîn a ni.

⁴I chungah, i chung chauhvah thil ka tisual a, I mit hmuha thil sual chu ka lo ti ta a: Thu i sawiin thiam i chan theiha, Ro i rêlin sawisêl bo i nih theih nân.

⁵Ngai teh, khawlohnaa dinin ka awm a; Ka nun sualin mi pai a.

⁶Ngai teh, chhûngril lamahte hian takna i duh ṭhîn a; Tichuan, lang lo lamah hian finna mi hriattîr ang.

⁷Husop-in mi tifai la; tichuan, ka fai ang. Mi sil fai la; tichuan, vûr aiin ka vâr ang.

⁸Hlimna leh lâwmna chu bengin mi hriattîr ang che; I ruh tihtliahte hi a hlim theih nân.

⁹Ka sualnate lakah hian i hmai thup la, Ka khawlohna zawng zawng hi thai bo vang che.

¹⁰Aw Pathian, keimahah hian thinlung thianghlim tak siam la, Ka kawchhûngah hian thlarau dik tak siam thar leh ang che.

¹¹I hnên ata hi mi paih bo suh la; I thlarau thianghlim hi mi lâksak suh ang che.

¹²I mi chhandam hlimna chu mi pe leh la, Thlarau tihnuamin mi chelh reng ang che.

¹³Chutichuan, bawhchhetute chu i kawng chanchinte ka zirtîr ang a; Tichuan, mi sualte chu i lamah an hawi leh ang.

¹⁴Aw Pathian, nang mi chhandamtu Pathian, thisen chhuahnate lakah mi chhanhim ang che; Tichuan, ka lei hian i felna thu hi hlim takin hlaah a sa ang.

¹⁵Aw LALPA, nangin ka hmui hi hawng ang che; Tichuan, ka kâ hian i fakna chu a hriattîr dâwn nia.

¹⁶Inthawina chungah lâwmna i nei si lo va, chuti ni suh sela chuan ka pe ang; Hâlral thilhlan chungah lungawina rêng i nei lo ve.

¹⁷Pathian duh zâwng inthawinate chu thlarau lungchhia hi a ni. Aw Pathian, thinlung lungchhia leh inchhîr ngawih ngawih hi i hmusit lo vang.

¹⁸I duh zâwng takin Zion chungah thil ṭha ti la; Jerusalem kulh chu rem ang che.

¹⁹Chutichuan, felna inthawinate chungah lâwmna i nei tawh ang a, hâlral thilhlan leh hâlral pumhlan chungah chuan; Chutichuan, i maichâm chungah chuan bâwngpate an hlân tawh ang.