Read Mizo_Old_version Sam 55 Bible Online

Sam 55 - Mizo_Old_version bible

Sam 55

¹Aw Pathian, ka ṭawngṭainaah hian beng lo chhi la; Khawngaih ka dîlnaah hian inthup suh ang che.

²Mi ngaithla la, mi chhâng ang che; Ka mangan thu avângin ka vân ruai a, ka rûm ṭhîn;

³Dotu thâwm avâng te, Mi suaksual hnehchhiahna avâng tein. Anni chuan sualnain mi lum khumin, Thinurin mi tiduhdah si a.

⁴Ka kawchhûngah hian ka thinlung a na êm êm a, Thih râpthlâknate chuan mi delh a.

⁵Ṭihna leh khurhnain mi bawh a, Hlauhnain mi khuh zo ta.

⁶Tichuan, “Aw, ṭhuro anga thla neih ka va duh êm! Chutichuan, ka thlâwk daih ang a, thlamuang takin ka awm ang.

⁷Ngai teh, hla takah ka lêng ang a, Thlalêrah ka awm ang. (Selah)

⁸Thli na tak leh thlipui hi Bîkna hmunah ka kalsan thuai tûr,” ka ti a.

⁹Aw LALPA, an lei chu tichhiain tithlêr ang che, Khawpuiah chuan inpâwngnêkna leh innghirnghona ka hmu si a.

¹⁰A chhûn a zânin khawpui chu kulh tlângah an vêl an vêl a: A chhûngah chuan sualna leh hrehawmna a awm bawk a.

¹¹Suahsualna a chhûngah a awm a; Bumna leh tihderna chuan a kawtlai chu a chhuahsan ngai lo.

¹²Mi sawichhetu chu hmêlma a ni si lo va; Ni sela chu, ka tuar thei zâwk tûr. Ka chunga intiliana chu mi hawtu a ni hek lo; Ni sela chu, ka bihrûksan tûr:

¹³Nimahsela, nang, ka mi anpui, Ka ṭhian, ka ṭhian kawmngeih i ni miau si a.

¹⁴Kam thlum taka kan inbiakrâwn ṭhina, Mipui zînga Pathian biak ina kan lên ṭhin kha.

¹⁵Thihna an chungah lo thleng thut sela, Khuarkhurumah chuan a nung chungin chhuk rawh se, Suahsualnate chu an awmnaah leh an kawchhûngahte a awm si a.

¹⁶Kei zawngin Pathian ka ko vang a; Tichuan, LALPAN mi chhandam ang.

¹⁷Tlaiah te, zîngah te, chhûnah te ka mangan thu ka sawiin, ka rûm ang a; Tichuan, anin ka aw a ngaithla ang.

¹⁸Ka chunga mi beihna lakah chuan ka nunna hi thlamuang takin a chhanhim ta a, Mi beitute chu an tam si a.

¹⁹Pathian, hmasâng chena awm renga chuan, A ngaithla ang a, anmahni a chhâng ang, (Selah) Danglamna nei ngai lo, Pathian ṭih ngai si lote chu.

²⁰Amah nêna inremte chungah chuan a kut a lek a; A thuthlung chu a tibawrhbâng ta a.

²¹A kâ chu hnutetui khal angin a tlawr a, A thinlung erawh chu indona a ni si a; A thute chu hriak aiin a nâl a, Nimahsela, khandaih phawi sate a ni si a.

²²I rit phurh chu LALPA chungah nghat la; Tichuan, anin a tichak ang che; Mi fel chu eng tikah mah tihnghîn a phal lo vang.

²³Nimahsela, aw Pathian, nangin anni chu boralna khuarkhurumah chuan i chhuktîr ang; Thisena tuihâlte leh bum hmangte chu an dam chhûng chanve pawh an dam zo lo vang. Kei erawh chuan nang ka ring ang che.