Read Mizo_Old_version Sam 56 Bible Online

Sam 56 - Mizo_Old_version bible

Sam 56

¹Aw Pathian, mi khawngaih ang che; mihringin mi lem zawh an tum si a; Nilêngin mi beiin mi hnehchhiah ṭhîn.

²Ka hmêlmaten nilêngin mi lem zawh an tum a, Chapo taka mi beitute hi an tam si a.

³Ka hlauh châng apiangin, Nangmah ka ring ang che.

⁴Pathian ka ring a, a thu ka fak ang a, Pathian ka ring a, ka hlau lo vang; Tisa chuan eng nge mi tih theih ang?

⁵Nilêngin ka thute an la kawi ṭhîn a; An ngaihtuahna zawng zawng chu ka ṭhat lohna tûr lam hlîr a ni.

⁶An inkhâwm a, an biru a, Ka hniakte an chhinchhiah ṭhîn a, Ka nunna tihbo tuma an nghâk ṭhîn ang hian.

⁷An sual hremna an pumpelh dâwn em ni? Aw Pathian, thinurin mi tin chu titlâwm ang che.

⁸Nangin ka vahvaihnate hi i chhinchhiah ṭhîn a; Ka mittuite hi i savun pengah chuan thun ang che; I lehkhabuah a chuang hlawm lâwm ni?

⁹Ka koh hun che ngei chuan mi dotute chu an tlânchhia ang; Hei hi ka hria, Pathianin mi ṭan hi.

¹⁰Pathianah chuan a thu ka fak ang a, LALPA-ah chuan a thu ka fak ang.

¹¹Pathian ka ring a, ka hlau lo vang. Mihringin eng nge mi tih theih ang?

¹²Aw Pathian, i hnênah thutiamte ka nei a; Lâwm thu sawi inthawinatein ka rûl ang che.

¹³Ka nunna hi thihna lakah i chhanhim si a. Ka kete hi tlu lo tûrin i chhanhim a ni lâwm ni? Mi nung êngah hian Pathian hmaa ka lên theih nân.