Read Mizo_Old_version Sam 57 Bible Online

Sam 57 - Mizo_Old_version bible

Sam 57

¹Aw Pathian, mi khawngaih rawh, mi khawngaih rawh; Ka nunna hi nangmahah chuan a tlu lût si a: A ni, i thla hnuai chu ka chuh ang, Vânduainate hi a kian hma loh chuan.

²Pathian Chungnungbera chu ka au vang; Pathian, engkim mi tihsaktu chu.

³Mi lem zawh tumtu chuan mi sawichhiat hunah, Ani chuan vân aṭangin a rawn tîr ang a, mi chhandam ang; (Selah) Pathianin a ngilneihna leh a thutak chu a rawn tîr chhuak ang.

⁴Ka nunna hi sakeibaknei zîngah a awm a; Mihring kâng zîngah ka awm a, An hâte chu fei leh thal ang a ni a, An lei lah khandaih hriam tak ang.

⁵Aw Pathian, nang chu vân khûm daih khian chawimawiin lo awm ang che; I ropuina chu leilung zawng zawng chungah hian lo awm rawh se.

⁶Ka ke awh nân lên an phah a; Ka nunna hi a kun ngawih ngawih a; Ka hmaah khuarkhurum an lai a; Anmahni ngei a lai takah an tla ta a. (Selah)

⁷Ka thinlung hi a nghet a ni, Aw Pathian, ka thinlung hi a nghet a ni; Hla ka sa ang, a ni, fakna hla ka sa ang.

⁸Ka ropuina, harh rawh; perhkhuang leh ṭingṭangte u, harh rawh u: Kei chu zîng takah ka harh ang.

⁹Aw LALPA, mi tin zîngahte lâwm thu ka hrilh ang che; Hnam tin zîngah nangmah fakin ka zai ang.

¹⁰I ngilneihna chu vân tawng khawpin a nasa si a, I thutak chu vân dum tawng khawpin a nasa bawk a.

¹¹Aw Pathian, nang chu vân khûm daih khian chawimawiin lo awm ang che; I ropuina chu leilung zawng zawng chungah hian lo awm rawh se.