Read Mizo_Old_version Sam 58 Bible Online

Sam 58 - Mizo_Old_version bible

Sam 58

¹Felna thu chu ngawi rengin maw in sawi tak tak? Aw, mihring fate u, dik takin maw ro in rêl?

²A ni, in thinlungah chuan thil sual tak in ti ṭhîn a; Leia in kuta thil râwng taka tih chu in bûk ṭhîn a.

³Mi suaksualte chu an nu pum chhûng aṭang rêngin Pathian laka ṭhenin an awm a: An pian veleh dâwt thu sawiin an vâk bo ṭhîn.

⁴An tûr chu rûl ang a ni a: Rûlrial bengngawng, a beng hup ṭhîn ang chu an ni;

⁵Chu chuan rûl dawi ât thiamte aw chu a ngaithla ṭhîn lo, Eng anga thiam pawhin dawi mah sela.

⁶Aw Pathian, an kâah chuan an hâte chu tibal la; Aw LALPA, sakeibaknei vânglaite ha lian pui puite chu kher chhuak ang che.

⁷Anni chu tui chak taka luang angin tui ral sela; A thaltea tinin, sah chhum angin awm zêl rawh se.

⁸Kawngkawrawi, tuia ral mai ṭhîn ang hi ni sela; A hun lova hmeichhe nau hrin, ni hmêl rêng rêng hmu lo ang hi ni rawh se.

⁹In bêlte chuan hlîng thing lum a hriat hma pawhin ani chuan ṭhâwngaleivirin a la bo vang, A hring leh a kâng lai pawh.

¹⁰Mi fel chuan phuba lâkna chu a hmuhin a lâwm ang a; Mi suaksual thisenah chuan a ke chu a sil ang.

¹¹Chutichuan, miten, “Mi fel tân chuan lâwmman a lo awm tak tak a; Leiah hian rorêltu Pathian a lo awm tak tak a nih hi,” an ti ang.