Read Mizo_Old_version Sam 59 Bible Online

Sam 59 - Mizo_Old_version bible

Sam 59

¹Aw ka Pathian, mi dotute lakah mi chhanhim la; Mi beitute lak ata hmun sângah mi hlâng ang che.

²Thil tisualtute lakah mi chhanhim la, Thisen chhuah hmangte lakah mi chhandam ang che.

³Aw LALPA, ka bawhchhiatna avâng ni lovin, ka sual avâng ni hek lovin, Ngai teh, ka nunna hi an châng reng si a, Mi chakte chu mi bei tûrin an pung khâwm a ni.

⁴Ka sual loh pawhin an tlân a, an inbuatsaih a; Mi ṭanpui tûrin intiharh la, en rawh.

⁵Aw LALPA, sipaihote Pathian, Israel-ho Pathian, Nangmah ngei chu hnam tinrêng tlawh tûrin tho la; Mi vervêk sual takte rêng rêng chu khawngaih suh ang che. (Selah)

⁶Tlai lamah an lo kal leh a, ui angin an chiau chûl a, Khawpui chu an vêl an vêl a.

⁷Ngai teh, an kâin an irh chhuak a; An hmuiah chuan khandaihte a awm a; “Tu nge hria awm ni?” an ti mai a.

⁸Nimahsela, aw LALPA, nangin anni chu i nuihsan zâwk ang a; Hnam tinrêng chu i nuihzatbûr ang.

⁹Aw mi tichaktu, ka nghâk reng ang che, Pathian chu ka kulhbîng sâng a ni si a.

¹⁰Ka chunga ngilnei Pathian chuan mi hmuak ang a; Pathianin ka hmêlmate chungah ka duhthusâm chu mi hmuhtîr ang.

¹¹Anni chu that suh ang che; chuti lo chuan, ka miten an theihnghilh dah ang e; Aw Lalpa, kan phaw ber, I thiltihtheihnain tidarh la, titlâwm ang che.

¹²An ka sualna avâng leh an hmuia thu chhuak avângin, An chapona ngeiah chuan âwk rawh se, An thusawi ṭhin ânchhe lawhna leh dâwt thu avâng pawhin.

¹³Anniho chu thinrimin tiboral la, an awm tawh lohna tûrin tiboral la; Pathianin Jakob-ho zîngah ro a rêl tih hre hlawm rawh se, Kâwlkil thlengin. (Selah)

¹⁴Tin, tlai lamah lo kal leh sela, ui angin chiau chûl sela, Khawpui chu vêl vêl rawh se.

¹⁵Anni chu ei tûr zawngin an vâk an vâk ang a, An tlai loh chuan an awm zankhua ang.

¹⁶Nimahsela, kei chuan i chakna thu hi hlaah ka sa ang a; A ni, zîngah chuan i ngilneihna thu hi hlim takin hlaah ka sa ang; Nang chu ka kulhbîng sâng, Ka mangan nia ka inhumhimna i ni si ṭhîn a.

¹⁷Aw mi tichaktu, nangmah fakin ka zai ang; Pathian chu ka kulhbîng sâng, ka chunga ngilnei Pathian chu a ni si a.