Read Mizo_Old_version Sam 61 Bible Online

Sam 61 - Mizo_Old_version bible

Sam 61

¹Aw Pathian, ka au thâwm hi lo hria la; Ka ṭawngṭaina hi ngaithla ang che.

²Ka thinlung a chauh laiin kâwlkil aṭang hian ka ko vang che; Lungpui ka aia sâng zâwkah chuan mi hruai ang che.

³Nang chu ka tân inhumhimna, Dotute lakah râlvên in sâng nghet tak i ni si a.

⁴I puan inah chuan kumkhuain ka awm ang a; I thla hnuai bihrûkna hmunah chuan ka tlu lût ang. (Selah)

⁵Aw Pathian, nang chuan ka thutiamte i ngaithla si a; I hming ṭihtute ram luah chu mi pe a.

⁶Lal dam chhûng hi i tisei ang a, A kumte chu chhuan tam tak tluk a ni ang.

⁷Pathian hmaah kumkhuain a awm reng ang. Aw, amah humhim theihna tûrin ngilneihna leh thutak buatsaih ang che.

⁸Chutichuan, ka thutiamte ni tin ka hlen theih nân, Kumkhuain i hming fakin ka zai ang.