Read Mizo_Old_version Sam 65 Bible Online

Sam 65 - Mizo_Old_version bible

Sam 65

¹Aw Pathian, Zion-ah chuan faknain a nghâk reng a che; Thutiam chu i lakah hlen a ni ang.

²Aw, ṭawngṭaina ngaithlatu, I hnênah tisa zawng zawng chu an lo kal ang.

³Khawlohnate chuan mi hneh ṭhîn na a; Kan bawhchhiatnate zawng nangin i tlêng fai ang chu.

⁴Mi, i biak in hung chhûng kawtlaiahte awm thei tûra i thlana, i kiang i pantîra chu a eng a thâwl e. I ṭhatna chuan kan tlai ang, I biak in hmun thianghlim ṭhatna chuan.

⁵Aw, min chhandamtu Pathian, Thil râpthlâktein fel takin min chhâng ang; Nang kâwlkila mi zawng zawng leh, Tuifinriat chung hla taka awmte rina chu i ni;

⁶Thiltihtheihnaa taia inhrênga, Mahni chaknaa tlângte tinghet ṭhîntu chu i ni;

⁷Tuifinriat ri hum hum, a fâwn ri hum humte leh, Mi tin sa mur mur tireh ṭhîntu chu i ni.

⁸Kâwlkil tâwpa awmte pawh chuan i hriattîrnate chu an hlau ṭhîn a; Zîng leh tlai chhuahnate chu hlimin i autîr ṭhîn.

⁹Lei hi i kan a, tuiin i châwm a, Nasa takin i tiṭha ṭhîn; Pathian lui chu tuiin a khat a; Lei hi chutianga i buatsaih hnu chuan an tân buh i siamsak ṭhîn.

¹⁰Lei hi a leileh rîn khawhna thlûrte chu tui tam takin i châwm a; A vûng thlûrte chu i timuk a; Ruahtuiin i tinêm a; A thil ṭote chu mal i sâwm ṭhîn a.

¹¹Kum chu i ṭhatna i khumtîr a; I kalna kawngte chu thil ṭhain a far ṭhîn.

¹²Thlalêra ran tlatna hmunahte chuan a far a, Tlângte pawh chu hlimnaa phuar vêlin an awm a.

¹³Ran tlatna hmunte chu ran rualin a dâpin a dâp a; Ruamte pawh chu buhin a tlim hmur a; Hlimin an au va, hla an sa bawk a.