Read Mizo_Old_version Sam 66 Bible Online

Sam 66 - Mizo_Old_version bible

Sam 66

¹Leilung luah zawng zawngte u, Pathian chawimawiin hlim takin au rawh u.

²A hming ropuizia chu hlain sa chhuak ula; A fakna chu tiropui rawh u.

³Pathian hnênah, “I thiltihte chu a va râpthlâk êm! I thiltihtheihna ropui nasatzia avângin nangmah dotute chu i hnênah an intulût ang.

⁴Leilung luah zawng zawng hian chibai an bûk ang chia, Nangmah fakin an zai ang a; I hming fakin an zai ang,” ti rawh u. (Selah)

⁵Hawh u, Pathian thiltihte hi en rawh u; Mihring fate chunga a thiltihah hian a hlauhawm a ni.

⁶Ani chuan tuifinriat kha lei rovah a chantîr a; Luipui kha kein an kal kai a. Chutah chuan amahah kan hlim a.

⁷A thiltihtheihna chuan kumkhuain ro a rêl a; A mitin hnam tin a en ṭhîn; Hel hmangte chu inchawimawi suh se. (Selah)

⁸Aw, mi tinte u, kan Pathian chu fak ula, Amah fakna thâwm chu hriattîr rawh u.

⁹Ani chuan kan nunna hi a tinung reng a, Kan kete hi tihsawn a phal lo.

¹⁰Aw Pathian, nangin min fiah a; Tangkaraw fiah angin min fiah a.

¹¹Nangin lênah min hruai lût a; Kan kâwngah hian phur rit tak i nghat a.

¹²Mihringte chu tawlailîr chunga chuangin, kan lu chungah i kaltîr a; Mei leh tui kan kal tlang a; Nimahsela, hmun chênghnâwng taka lût tûrin min hruai chhuak a ni.

¹³Hâlral thilhlante nên i inah ka lût ang a, Ka thutiamte chu i lakah ka hlen ang,

¹⁴Ka hmuiin a sawia, Manganga ka awm laia ka kâin a sawite chu.

¹⁵Sa thau tak hâlral thilhlante i hnênah ka hlân ang a, Berâmpa hâl rimtui nên; Bâwngpate, kêlte nên ka hlân ang. (Selah)

¹⁶Hawh u, Pathian ṭih zawng zawngte u, ngaithla rawh u; Tichuan, ka nunna tâna a thiltih chu ka hriattîr ang che u.

¹⁷Ani chu ka kâin ka au va, Ka leia chawimawiin a awm a.

¹⁸Ka thinlunga sualna ka ngaihsak chuan, LALPAN mi ngaithla lo vang.

¹⁹Nimahsela, Pathianin mi ngaithla tak tak a; Ka ṭawngṭaina thâwm chu a bengkhawn a ni.

²⁰Pathian-ka ṭawngṭaina hlawhchhamtîr lova, ka laka a ngilneih bâng hek lova chu, Fakin awm rawh se.