Read Mizo_Old_version Sam 68 Bible Online

Sam 68 - Mizo_Old_version bible

Sam 68

¹Pathian chu tho sela, a dote chu tihdarhin awm sela; Amah hawtute pawh chu a hmaah tlânchhe rawh se.

²Meikhu hi len bova a awm angin, anni chu lên bo vang che; Khawihnûn hi mei luma a tui ral angin, Mi suaksualte chu Pathian hmaah boral rawh se.

³Mi felte erawh chu lâwm takin awm sela; Pathian hmaah hlim rawh se; A ni, lâwm takin hlim rawh se.

⁴Pathian chawimawiin hla sa ula, a hming fakin zai rawh u; Tawlailîra thlalêrte kaltlang tûra tân chuan lamlian sial rawh u; A hming chu JAA a ni a, a hmaah chuan hlim rawh u.

⁵Pathian, a awmna thianghlima awm chu, Pa nei lote pa leh hmeithaite ngaihtuahtu a ni.

⁶Pathian chuan mi malte chu chhûngkaw zîngahte a teltîr ṭhîn a; Mi tângho chu a hruai chhuak a, vânneihnaah a hruai lût ṭhîn; Hel hmangte erawh chu ram rovah an awm ṭhîn.

⁷Aw Pathian, i mite hma hruaia i lo chhuaha, Thlalêra i kaltlang lai khân, (Selah)

⁸Lei hi a nghîng dur dur a, Vânte pawh khi Pathian hmaah chuan a far a; Sinai tlâng meuh pawh saw Pathian hmaah, Israel-ho Pathian hmaah chuan a nghîn dur dur kha.

⁹Aw Pathian, nang chuan ruah tam tak i sûrtîr a, I ro chan chu a chauh lai khân i tinghet a.

¹⁰I hote chuan chutah chuan awmhmun an khuar a; Aw Pathian, nang chuan i ṭhatnain retheite tân i buatsaih a.

¹¹ LALPAN thu chu a pe ṭhîn a, Chanchin hriltu hmeichhe tam takin an hril darh a.

¹²Sipaiho lalte chu an tlânchhia an tlânchhia a; In nghâktunu chuan râllâk sum chu a sem a.

¹³Ṭhuro thla tangkaruaa tuama, A thla hmâwr pawh rangkachak enga tuam angin berâm huang kârahte i mu dâwn em ni?

¹⁴Engkimtitheian chutah chuan lalte a tihdarh lai chu, Zalmon tlânga vûr sûr lai ang a ni.

¹⁵Basan tlâng chu Pathian tlâng a ni a; Basan tlâng chu tlâng sâng tak a ni.

¹⁶Tlâng sâng takte u, Pathianin a awmna tûra a tlâng duh chu engah nge îtsîka in melh ni? A ni, LALPA chu chutah chuan kumkhuain a awm reng dâwn asin.

¹⁷Pathian tawlailîr chu a sînga sîng, a sânga sâng tam tak a ni; LALPA chu Sinai tlânga a awm ang khân, chûng zîngah chuan hmun thianghlimah a awm ta.

¹⁸Nang chu chung lamah i chho va, i mante chu salah i hruai a; Mihringte zîngah thilpêkte i dawng a, A ni, hel hmangte zîngah pawh; LALPA Pathian chu an hnêna a awm theih nân.

¹⁹ LALPA, kan phur ni tina min phurhsaktu, Min chhandamtu Pathian chu, fakin awm rawh se. (Selah)

²⁰Pathian chu kan tân chhanhimtu Pathian a ni; Thihna ata chhuahnate chu Lalpa JEHOVA ta a ni bawk.

²¹Nimahsela, Pathianin amah dotute lu chu a sât phel phawk ang, A thiam lohnaa la kal zêla lu vun sam buk tak chu.

²² LALPAN, “Basan ram aṭangin ka hruai leh ang a, Tuifinriat mawng thûk tak ata chu ka hruai leh ang.

²³I ke chu thisena i hnim theiha, I ui leite chuan i dote laka chan a neih theih nân,” a ti a.

²⁴Aw Pathian, i kal laite an hmu a, Ka Pathian, ka Lalber hmun thianghlima kal laite chu.

²⁵Nula khuangte bêngho laiah chuan, Hla satute an kal hmasa a, englo tumtute chuan an zui a.

²⁶Inkhâwmnaahte hian Pathian fak ula, Israela tuihnaa chhuakte u, LALPA chu fak rawh u.

²⁷Fa tlum Benjamin-hovin hma hruaiin, Juda-ho mi liante leh an upahote, Zebulun-ho mi liante, Naphtali-ho mi lianten an zui a.

²⁸I Pathian chuan i thiltihtheihna chu thu a pe a: Aw Pathian, kan tân thil min tihsak chu tichak ang che.

²⁹Jerusalem-a i biak in avângin Lalhovin lâwmmante an la rawn kensak ang che.

³⁰Sakawlh, phairuang zînga chêng chu zilh la, Hnam dang, bâwngchal leh bâwngno rualte chu zilh la, Kûna an tangkate i hmaa an hlan hma chu; Indo châk mite chu tidarh rawh.

³¹Aigupta ram aṭangin mi liante an lo chhuak ang a; Ethiopia-ho chu Pathian lama an kut phar tûrin an hmanhmawh ang.

³²Leilung ramte u, Pathian chawimawiin hla sa ula; Aw, LALPA fakin zai rawh u; (Selah)

³³Vânte vân hmasânga awmte chunga chuanga chu; Ngai teh, a aw a chhuah e, aw nasa tak mai chu.

³⁴Pathian hnênah chuan chakna pe rawh u: A ropuina chu Israel-ho chungah a awm a, A chakna chu vân dumahte khian a awm.

³⁵Aw Pathian, i hmun thianghlim aṭangte chuan i hlauhawm a ni. Amah Israel-ho Pathian ngei chuan a mite hnênah chakna leh thiltihtheihna a pe ṭhîn a ni. Pathian chu fakin awm rawh se.