Read Mizo_Old_version Sam 69 Bible Online

Sam 69 - Mizo_Old_version bible

Sam 69

¹Aw Pathian, mi chhandam ang che; Tuite chu ka nunna thleng hian a lût ta si a.

²Chirhdûp thûk tak, rahchhan rêng rêng awm lohnaah ka pil tual tual hi; Tui thûk tak, tui lian mi chîm pilnaahte ka lo luh tâk hi.

³Ka auna lamah ka chau va; ka dang a ro zo va; Ka Pathian ka nghahnaah hian ka mit a vai zo ta.

⁴Enga khaw lawilova mi hawtute chu ka samzai aiin an tam a; Dik lo taka mi dova mi tihboral tumte chu mi chak tak an ni: Ka lâk si loh pawh mi rulhtîr a.

⁵Aw Pathian, nang chuan ka âtzia hi i hria a; Ka thiam lohnate pawh hi i lakah thup a ni lo.

⁶Aw LALPA, sipaihote PATHIAN, nangmah nghâktute chu keimah avângin mualpho suh sela; Aw Israel-ho Pathian, nangmah zawngtute chu keimah avângin tihzahin awm suh se.

⁷Nangmah avânga sawichhiat ka tuar avângin, Zahnain ka hmai a khuh zo ta.

⁸Ka unaute lakah mikhual ka lo ni ta a, Ka nu fate lakah hriat ngai loh mi ka lo ni ta.

⁹I ina ka ṭhahnemngaihnain mi ei zo va; Nangmah sawichhetute sawichhiatnate chu ka chungah a tla ta.

¹⁰Ka ṭaha, chaw nghei chunga ka nunna ka thunun leh, Chu chu mi sawichhiatna a lo ni a.

¹¹Ka silhfêna saiip ka hman leh, An tân chhe lama tehkhinna ka lo ni zêl a.

¹²Kulh kawngkâa ṭhute chuan ka chungchâng thu an sawi a; Zu ruih hmangte hla ka nih hi.

¹³Nimahsela, aw LALPA, kei zawng hun lâwmawmah i hnênah a ni ka ṭawngṭai ni; Aw Pathian, i ngilneihna nasa tak avângin i chhandamna thutakin mi chhâng ang che.

¹⁴Chirhdûp ata hi mi chhanhim la, mi piltîr lul suh ang che: Mi hawtute lakah leh tui thûk tak ata hi chhanhimin mi awmtîr ang che.

¹⁵Tui lianin mi chîm pil suh sela, Tui thûk takin mi lem hek suh se; Khuarkhurum pawhin a kâ mi chîp hnan suh se.

¹⁶Aw LALPA, mi chhâng ang che; i ngilneihna chu a ṭha si a; I lainatna nasatzia ang zêlin ka lam hi lo hawi ang che.

¹⁷I chhiahhlawh lakah hian i hmai pawh thup suh ang che; Ka mangang si a, mi chhâng thuai ang che.

¹⁸Ka nunna hi rawn hnaihin, tlan la; Mi dotute avâng hian mi chhanhim ang che.

¹⁹Nangin mi min sawichhiatna te, ka mualphona te, ka zahna te hi i hria e; Mi dotute chu i hmaah an awm vek a ni.

²⁰Mi min sawichhiatna hian ka lung a tichhia a; nasa takin ka lungngai bawk a; Tichuan, mi khawngaihtu tûr ka zawng a; nimahsela, tu mah an awm si lo va; Mi thlamuantu tûrte ka zawng bawk a; nimahsela, tu mah ka hmu si lo.

²¹Ka chaw atân englo khâ mi pe a; Ka tuihâl lahin in atân uain thûr mi pe a.

²²An hmaa an dawhkân chu thang lo ni sela; Thlamuang taka an awm laiin fal lo ni rawh se.

²³An mitte chu, an hmuh theih loh nân tihthimin awm rawh se; An kâwngte chu tikhûr fo vang che.

²⁴I lungnih loh êm êmna chu an chungah leihbua la, I thinurna nasa tak chuan anni chu man rawh se.

²⁵An awmna chu lo ram sela; An puan inahte chuan tu mah awm suh se.

²⁶I vuaka chu an tiduhdah a, I hliamate lungngaihzia chu an sawi si ṭhîn a.

²⁷An khawlohna chu khawlohnain belhchhah la; Anni chu i felnaah chuan lût suh se.

²⁸Anni chu nunna bu ata thai bovin awm sela, Mi felte zîngah chuan ziak ni ve suh se.

²⁹Nimahsela, kei chu rethei tak leh lungngai tak ka ni a; Aw Pathian, i chhandamna chuan hmun sângah mi dah rawh se.

³⁰Pathian hming chu hlain ka fak ang a, Lâwm thu sawiin amah chu ka chawimawi ang.

³¹Chutiang chuan bâwngchal emaw, ki leh tin nei bâwngpa emaw ai chuan, LALPA a tilawm zawk ang. Chutiang chuan LALPA a tilâwm zâwk ang.

³²Thuhnuairawlhte chuan chu chu an hmu a, an lâwm a; Nangni Pathian zawngte u, in thinlung chu nungin awm rawh se.

³³ LALPAN pachhiate chu ngaithlain, A mi tângte chu a hmusit si lo va.

³⁴Lei leh vân chuan amah chu fak rawh se, Tuifinriatte leh a chhûnga thil che thei tawh phawtte nên.

³⁵Pathianin Zion chu chhanchhuakin, Juda khuate chu a din dâwn si a; Tichuan, chutah chuan an awm ang a, an nei nghâl ang.

³⁶A chhiahhlawhho thlahte pawh chuan an rochung ang a; A hming ngainatute chu a chhûngah an awm ang.