Read Mizo_Old_version Sam 7 Bible Online

Sam 7 - Mizo_Old_version bible

Sam 7

¹Aw LALPA ka Pathian, nangmahah ka rinna ka nghat a; Mi ûmtute zawng zawng lakah hian mi chhandamin mi chhanhim ang che;

²Chuti lo chuan, chhanhimtu awm lovin, sakeibaknei angin, Ka nunna hi pawt sawmin, a sawisa dah ang e.

³Aw LALPA ka Pathian, hetianga ti ka lo niha, Ka kuta sualna lo awm a niha,

⁴Ka ṭhian chu sualnaa thungrûl ka lo nih chuan, (A ni, enga khaw lawilova mi dotu hi ka chhanhim zâwk a ni;)

⁵Dotu hian ka nunna hi ûmin, ûmphâk mai rawh se. A ni, ka nun hi leiah chîl thluin, Ka ropuina hi vaivut zîngah dah mai rawh se. (Selah)

⁶Aw LALPA, thinurin tho la, Mi dotute thinrimna dovin thawk la; Ka tân intiharh rawh; dikna i phût si a.

⁷Tichuan, mi tin inkhâwmho chuan hual vêl che rawh se; Tin, nang chu an chung lamah chuan kîr leh ang che.

⁸ LALPAN mi tin ro a rêl ṭhîn; Aw LALPA, keimaha ka felna leh ka rilru ṭhatna awm ang zêl hian ro mi rêl ang che.

⁹Aw, mi suaksualte suahsualna chu lo tâwp tawh sela, Mi felte erawh chu tinghet ang che; Pathian fel tak chuan thinlungte leh rilrute a fiah ṭhîn si a.

¹⁰Ka phaw chu Pathian hnênah a awm, Amah chu thinlung dik tak pu chhandamtu a ni.

¹¹Pathian chu rorêltu fel tak a ni, A ni, ni tin mi sualte chunga lungnih lohna nei Pathian a ni.

¹²Mi a hawi kîr loh zawngin ani chuan a khandaih a tât hriam ang; A thal ngul chu a kuai a, a peih ta.

¹³Thihna hriamhreite chu amah thah nân a siam ta diam bawk a; A thalte chu alh theiin a siam a.

¹⁴En teh, sualna a vei a; A ni, suahsualna a pai a, Dâwt thu a hring ta a.

¹⁵Khuarkhurum a siam a, thûk takin a lai a, Ama hum siamah chuan a tla ta a.

¹⁶A suahsualna chu ama lu chung ngeiah a kîr leh ang a, Râwng taka a thiltih chu ama chhîp ngeiah a tla ang.

¹⁷A felna avâng hian, LALPA hnênah lâwm thu ka sawi ang a, LALPA Chungnungbera hming fakin ka zai bawk ang.