Read Mizo_Old_version Sam 71 Bible Online

Sam 71 - Mizo_Old_version bible

Sam 71

¹Aw LALPA, nangmahah chuan ka rinna ka nghat ṭhîn a; Eng tikah mah mualphovin mi awmtîr suh ang che.

²I felna avânga mi chhanhimin, mi chhanchhuak la; Ka lamah hian i beng rawn dawhin, mi chhandam ang che.

³Ka tân awmna lungpui, ka kal fo theihna tûr lo ni ang che; Nangin mi chhandam tûrin thu i pe a; Ka lungpui leh ka kulhpui i ni si a.

⁴Aw ka Pathian, mi suaksual kut ata mi chhanchhuak ang che, Mi fel lo leh nun chhe tak kut ata chu.

⁵Aw Lalpa PATHIAN, nang chu ka beiseia chu i ni si a; Ka naupan têt ata ka rina chu i ni.

⁶Ka nu pum aṭang rêngin nangma kaihin ka awm ṭhîn; Ka nu rîl ata mi la chhuaktu i ni a; Nangmah a ni ka fak fo dâwn che ni.

⁷Mi tam tak ngaihin thil mak ang ka ni a; Nimahsela, nang chu ka inhumhimna nghet tak i ni.

⁸Ka kâ hi nangmah faknain a khat ang a, Nilêngin nangmah chawimawinain a khat bawk ang.

⁹Ka tar hunin mi paih thla suh la; Ka tha a ṭhum hunin mi kalsan suh ang che.

¹⁰Mi dotute chuan ka chungchâng thu an sawi si a; Ka nunna chângtute an inrâwn bawk a,

¹¹“Pathianin a kalsan ta; ûm ula, man rawh u; chhanhimtu tûr rêng an awm si lo,” tiin.

¹²Aw Pathian, mi hlat lul suh la; Aw ka Pathian, mi ṭanpui tûrin hmanhmawh ang che.

¹³Ka nunna dotute chu mualpho leh boralin awm sela; Ka chhiatna tûr zawngtute chu sawichhiatna leh zahnaa khuhin awm rawh se.

¹⁴Nimahsela, kei zawngin ka beisei fo vang a, Ka la fak zual deuh deuh vang che.

¹⁵Ka kâ hian i felna thu a hril ang a, Nilêngin i chhandamna thu a hril bawk ang; A tam chin ka hre si lo.

¹⁶Lalpa PATHIAN thiltih ropui takte nên ka lo kal a; I felna, nangma felna thu chauh ka sawi ang.

¹⁷Aw Pathian, ka naupan têt ata nangin mi zirtîr a; Tûn thlengin i thil mak tihte chu ka hriattîr ṭhîn.

¹⁸A ni, aw Pathian, ka tara ka lu ṭuak hun pawhin mi kalsan lul suh ang che; I chakna hi ṭhangthar lehte hnênah leh, I thiltihtheihna hi lo la awm tûr apiangte hnêna ka hriattîr hma loh zawng.

¹⁹Aw Pathian, i felna pawh a sâng êm êm a ni; Aw Pathian, nang thil ropui takte titu, Nangmah ang hi tu nge awm?

²⁰Nang, manganna tam tak leh nasa tak mi hmuhtîrtu chuan, Mi tinung leh ang a, Lei thûk tak ata mi hruai chhuak leh ang.

²¹Nangin ka ropuina mi tihpunsak la, Lo hawi lehin mi thlamuan ang che.

²²Perhkhuangin ka fak bawk ang che, Aw ka Pathian, i thutak ngei chu ka fak ang. Aw nang Israel-ho Mi Thianghlim, ṭingṭang nên nangmah fakin ka zai ang.

²³Nangmah faka ka zai hunin ka hmui hi a hlim êm êm ang a; Ka nunna i tlan pawh hi a hlim êm êm ang.

²⁴Ka lei pawh hian nilêngin i felna thu a sawi ang; Ka chhiatna tûr zawngtute chu an mualphovin an zak ta si a.