Read Mizo_Old_version Sam 73 Bible Online

Sam 73 - Mizo_Old_version bible

Sam 73

¹Pathian chu Israel-ho chungah a lo ṭha ngei mai, Thinlunga thianghlimte chungah chuan.

²Nimahsela, kei zawngin ka rap pelh ṭhelh ṭhelh a; Ka ke pênte hi a tleu lek lek a ni.

³Mi suaksualte vânneihzia ka hmuh hian, Mi uangthuangte chu ka awt si a.

⁴An thih lai chuan tuarna rêng an nei lo va; An chakna chu a nghet zâwk mah si a.

⁵Mi dang anga hrehawmin an awm lo va; Mi dang anga sawisakin an awm hek lo.

⁶Chuvângin, chapona chuan khaidiat angin an nghâwng a vêl a; Nunrâwnna chuan silhfên angin a tuam a.

⁷Thau avângin an mit a pâwng a; Thinlunga duhthusâm aia nasa an nei a.

⁸An nuihsan a, sual takin hnehchhiahna thu an sawi a; Chapo takin an ṭawng ṭhîn a.

⁹An kâ chu vânahte khian an dah a, An lei chuan leilung hi a fang tlang ṭhîn a.

¹⁰Chuvângin, a mite chu chutah chuan an kîr leh a, Nova tui khat chu anmahni in fai kêlhin a awm a.

¹¹“Pathianin engtin nge a hriat ang? Chungnungberan a hre chhuak ang em ni?” an ti a.

¹²En teh, hêngho hi mi suaksualte an nih hi; Nuamsa taka awm fovin an hausa deuh deuh ṭhîn.

¹³A thlâwn maiin a ni ka thinlung hi ka tihfaia, Ka kutte hi sawisêl bonaa ka sil ni.

¹⁴Nilêngin sawisakin ka awm a, Tûk tin zilhhauvin ka awm si a.

¹⁵“Chutiang chuan ka sawi ang,” lo ti ta ila; Ngai teh, i fateho chhuan chungah vervêk taka ti ka lo ni ang.

¹⁶Chu chu ka hriat theihna tûrzia ka ngaihtuahin, Ka tân a har lutuk a ni;

¹⁷Pathian hmun thianghlimah ka luha, An tâwpna tûr chu ka ngaihtuah hma chuan.

¹⁸Anni chu hmun nâl takahte i dah ngei a; Chhiatnaahte i paihthla ṭhîn a.

¹⁹Engtizia nge mit khap kâr chauhva an ṭiau tâk ni aw! Thil râpthlâk taktea tihboral daihin an awm ta a nih hi.

²⁰Miin men hnua mumang an ngainêp angin, Aw LALPA, i harh hunin anmahni lem pawh chu i ngainêp ang.

²¹Ka thinlung hi a lungngai a, Ka rilruah pawh chhun angin ka awm si a;

²²Mi mâwl leh eng mah hre lo ka ni a, I lakah chuan sa ang mai ka nih hial ṭhin kha.

²³Nimahsela, i hnênah ka awm fo va; Ka kut ding lam hi i lo chelh ṭhîn a.

²⁴Nangin i remruatnain mi hruai ang a, Chumi hnuah chuan ropuinaah khian mi lâwm ang.

²⁵Vânah khian nang lo chu tu nge ka neih? Leiah pawh hian nang lo chu ka duh tu mah an awm lo.

²⁶Ka tisa leh ka thinlung hi a chau ta a; Nimahsela, Pathian chu kumkhuaa ka thinlung chakna tûr leh ka chanvo tûr a ni.

²⁷Ngai teh, nangmah hlata awmte chu an boral dâwn si a; A uiresantu apiang che chu i tiboral ta a.

²⁸Keia tân erawh zawng Pathian hnaih hi a ṭha a ni; Lalpa PATHIAN chu ka inhumhimnaah ka hmang a, I hnathawh zawng zawng thu chu ka hrilh theih nân.