Read Mizo_Old_version Sam 74 Bible Online

Sam 74 - Mizo_Old_version bible

Sam 74

¹Aw Pathian, engati nge kumkhua atân min thlauhthlâk le? Engati nge i ran tlatna hmuna berâmte chungah hian i thinur a khûk le?

²I mite inkhâwmho, hmasanga i lei, Hnam, i ro atân i tlan kha, hre reng ang che; I awm ṭhinna Zion tlâng nên.

³Chhe let dêr tawh chu han fang teh, Dotuten hmun thianghlimah chuan thil sual tinrêng an tih tâk hi.

⁴Nangmah dotute chu i mite inkhâwmho zingah an haw haw dur dur a; An chhinchhiahnate chu chhinchhiahna tûrin an târ ta a.

⁵Mi, ngaw bing thing hreipuia tinte angin an lang.

⁶Tûnah chuan a thil ker mawi zawng zawng chu hreitê leh tubohtein an tichhe hlawm a.

⁷I hmun thianghlim chu an hâl a; I hming awmna chu titlusawpin an tibawrhbâng a.

⁸An rilruah chuan, “I tichhe vek hlawm ang u,” an ti a; He rama Pathian inkhâwmna in zawng zawng hi an hâl chhe zo ta.

⁹Kan chhinchhiahnate chu kan hmu ta lo va; Zâwlnei rêng rêng an awm ta lo va; A rei tûr chin hria rêng rêng kan zîngah an awm hek lo.

¹⁰Aw Pathian, dotu chuan eng chen nge a sawichhiat dâwn che? Hmêlma chuan i hming hi kumkhuain a sawichhe dâwn em ni?

¹¹Engati nge i kut, i kut ding lam kha i lâk tâk le? Phawrh chhuak leh la, anniho chu tiboral rawh.

¹²Nimahsela, Pathian chu hmasâng chena ka Lal a ni, Lei lai taka chhandamna siam ṭhîntu chu.

¹³Nang chuan i chaknain tuifinriat kha i tiṭhen a; Nang chuan tuia dragon-ho lute chu i tikeh a.

¹⁴Nang chuan leviathan lute chu i tikeh sawm a, Ani chu thlalêra mi awmte hnênah chuan chaw atân i pe a.

¹⁵Nang chuan tuihna leh tui lian chu i sah huk a; Nang chuan lui lian tak takte i tikang a.

¹⁶Chhûn hi i ta a ni a, zân pawh i ta a ni; Nangin êntu leh ni khi i buatsaih a.

¹⁷Nangin leilung ramri zawng zawng chu i kham vek a; Nangin nipui leh thlasik hi i siam a.

¹⁸Aw LALPA, hei hi hre reng ang che, dotu chuan a sawichhiat chia, Hnam â tak chuan i hming an sawichhiat kha.

¹⁹Aw, i ṭhuro nunna hi ram sakawlh hnênah chuan pe lul suh la; I mi retheite nunna hi kumkhua chuan theihnghilh suh ang che.

²⁰Thuthlung kha rawn pawisa ang che; Lei hmun thim laite chu nunrâwnna awmnain a khat si a.

²¹Aw, hnehchhiahna tuarte chu mualphovin kîr suh sela; Rethei leh pachhiate chuan i hming fak rawh se.

²²Aw Pathian, tho la, nangma thu chu insawi chawp la; Mi â chuan nilênga a sawichhiatna che chu hre reng ang che.

²³Nangmah dotute thâwm chu theihnghilh suh ang che; Nangmah beitute sa mur mur chu a chho fo ṭhîn a ni.