Read Mizo_Old_version Sam 75 Bible Online

Sam 75 - Mizo_Old_version bible

Sam 75

¹Aw Pathian, lâwm thu kan hrilh a che; Lâwm thu kan hrilh a che, i hming a hnai si a; Miten i thil mak tih thute chu an hril ṭhîn.

²Hun ruat chu ka hmuh hunah chuan dik takin ro ka rêl ang.

³Lei leh a chunga awm zawng zawngte chu an tui ral zo ta; Keiin a bante chu ka phun a ni. (Selah)

⁴Mi uangthuangte hnênah chuan, “Uangthuang takin awm suh u,” ka ti a: Mi suaksualte hnênah, “In ki tisâng suh u,” ka ti bawk a.

⁵In ki chu chung lamah tisâng suh ula; Ring khawng chungin ṭawng suh u.

⁶Tihsânna chu chhak lam ata a ni lo va, thlang lam ata a ni hek lo. Chhim lam ata lah a ni hek lo.

⁷Pathian chu rorêltu a ni zâwk: Ani chuan pakhat a titlâwm a, pakhat a tisâng ṭhîn.

⁸ LALPA kutah chuan no a awm si a, a uain chu a phûl a; Thil dang nêna chawhpawlhin a khat a, chuta mi chu a bun chhuak a; Matheilovin a nawite nên lam leia mi suaksual zawng zawngte chuan an in fai kêlh ang.

⁹Nimahsela, kei chuan kumkhuain ka hriattîr ang a, Jakoba Pathian fakin ka zai ang.

¹⁰Mi suaksualte ki zawng zawng pawh ka tansak ang a; Mi felte ki erawh chu tihsânin a awm ang.