Read Mizo_Old_version Sam 77 Bible Online

Sam 77 - Mizo_Old_version bible

Sam 77

¹Ka awin Pathian chu ka au vang a; Ka awin Pathian ngei chu ka au vang a, ani chuan ka lamah beng a lo chhi ang.

²Ka mangan ni chuan LALPA ka zawng a; Ka kut hi zânah pawh la thla lovin ka phar reng a; Ka nunna hian thlamuan a duh lo.

³Pathian ka hre reng a, ka buai ṭhîn; Ka ngaihtuah a, ka thlarau hi a chau ṭhîn. (Selah)

⁴Ka mitte hi i chelh meng reng ṭhîn a; Ṭawng thei lo khawpin ka mangang ṭhîn.

⁵Hmasâng nite ka ngaihtuah a, Hmânlai kumte chu.

⁶Zânah ka ngaihtuah neuh neuh va, Ka dâwn vêl a, ka inzâwt ṭhîn a; Ka thlarau pawhin ṭhahnemngai takin a zawng a.

⁷ LALPA chuan kumkhuain a thlauthla dâwn em ni aw? Eng tikah mah a lâwm dâwn tawh lo em ni aw?

⁸A ngilneihna chu a bo hlen kumkhua dâwn em ni aw? A thutiam chu chhuan zawng zawng thlengin a bo dâwn em ni aw?

⁹Pathian chuan khawngaih a theihnghilh em ni aw? A lainatnate chu thinurin a khâr ta em ni aw? (Selah)

¹⁰Tin, “Chu chu ka chak lohna avâng a ni; Nimahsela, Chungnungbera kut ding lam kumte kha ka hre reng ang e.

¹¹“LALPA thiltih thute kha ka sawi ang a; Hmasânga i thil mak tihte kha ka hre reng ang e.

¹²I hnathawh zawng zawng kha ka ngaihtuah bawk ang a, I thiltihte pawh kha ka chhût ang e,” ka ti a.

¹³Aw Pathian, i kawng chu hmun thianghlimah a awm a; Kan Pathian ang hi pathian ropui tu nge awm?

¹⁴Nang chu thil mak ti ṭhîntu Pathian chu i ni a: Mi tin zîngah chuan i chakzia i hriattîr ṭhîn.

¹⁵I bânin i mite i chhanchhuak a, Jakoba leh Josefa fate chu. (Selah)

¹⁶Aw Pathian, tuite chuan an hmu chia; Tuite chuan an hmu chia, an hlau va; Tui thûk takte chu an khûr bawk a.

¹⁷Chhûmte khian tui an leihbua a; Vânte khian aw an chhuah a; I thalte pawh a phe zawk zawk a.

¹⁸I khawpui ri thâwm chu ṭhâwngaleivirah a awm a; Kâwlphete chuan khawvêl hi a ên zawk zawk a; Lei hi khûrin a nghîng dur dur a.

¹⁹I kawng chu tuifinriatah a awm a, I kalkawngte chu tui zau takah a awm a, I hniakte pawh hmuh theih a ni lo.

²⁰Mosia leh Arona kutin I mite chu berâm rual angin i hruai ṭhîn a ni.