Read Mizo_Old_version Sam 78 Bible Online

Sam 78 - Mizo_Old_version bible

Sam 78

¹Aw ka mite u, ka dân thu-ah hian beng lo chhi ula; Ka kâa thu-ahte hian in beng rawn dawh rawh u.

²Tehkhin thuin ka kâ ka âng ang a; Hmasânga thuril sawite kha ka sawi chhuak ang:

³Chûng chu kan bengin kan hria a, kan rilruin kan hre bawk a, Min thlahtute pawhin min hrilh kha.

⁴Chûng chu an fate lakah kan zêp lo vang a, ṭhangthar lo la awm tûr hnênah LALPA fakna thu leh, A chakzia leh a thil mak tak tihziate chu kan hril zâwk ang.

⁵Jakob-ho zîngah thuhriattîr a tinghet a, Israel-ho zîngah dân a ruat a. Chûng chu kan thlahtute hnênah thupêkin a pe a. Anni chuan chûng thu chu an fate hnêna an hriattîr tûrin;

⁶Ṭhangthar lo la awm tûr, Naupang lo la piang tûrte chuan, an hriat theih nân; Chûngte chu an thawha, an fate an la hrilh chhâwn zêlna tûrin;

⁷An beiseina chu Pathianah an nghah theiha, Pathian thiltihte chu an theihnghilh lohva, A thupêkte chu an zawm zâwk nân;

⁸An thlahtute anga chhuan luhlul leh hel hmang, Chhuan thinlung siam dik lo, Pathian laka rilru rinawm lo pua an awm loh nân.

⁹Ephraima thlahte chu râlthuama inthuama, thal ngul kengin, Inbeih niah chuan an tlânchhia a.

¹⁰Pathian thuthlung chu an vawng lo va. A dân an zâwm lo bawk a;

¹¹A thiltihte chu an theihnghilh a, A thil mak tih a hmuhtîrte nên khân.

¹²An thlahtute mit hmuhah thil mak takte a ti ṭhîn, Aigupta ramah, Zoan phûlah chuan.

¹³Tuifinriat chu a tiṭhen phawk a, Anni chu a kal kaitîr a; Tuite chu englo dah khâwm thûr angin a dintîr luah a.

¹⁴Chhûnah chuan chhûmin a hruai a, Zankhuain mei êngin a hruai bawk ṭhîn a.

¹⁵Thlalêrah chuan lungpuite a tiphel a, Tui thûk tak ata ang mai hnianghnâra in tûr a pe a.

¹⁶Lungpui aṭang chuan luite a tichhuak a, Tuite chu luipuite angin a luan thlâktîr a.

¹⁷Chuti chung pawhin a chungah thil an la tisual ta cheu va, Thlalêrah chuan Chungnungbera lakah an hel a.

¹⁸An châkna tihreh nâna ei tûr dîlin, An thinlungin Pathian an fiah a.

¹⁹A ni, Pathian an sawi hnâwm a: “Thlalêrah hian Pathianin dawhkân a buatsaih thei em maw chu?

²⁰Ngai teh, lungpui chu a vua a, tuite kha a lo khawh chhuakin, Luite chu a kuang a liam dûl dûl ta tak a; Chaw pawh a pe thei nghâl em maw chu? A mite tân hian sa a buatsaih ang em maw chu?” an ti a.

²¹Chutichuan, LALPA chuan a lo hria a, a thin a rim ta a: Jakob-ho chungah mei a lo alh chhuak a, Israel-ho chungah thinurna a lo chho ta a;

²²Pathian an rin lohva, A chhandamna pawh an rin loh avângin.

²³Nimahsela, chung lam vân dumte khi thu a pe a, Vân kawngkhârte khi a hawnsak a;

²⁴An ei atân manna kha an chungah a zuk sûrtîr a, Vân buh chu a pe a ni.

²⁵Mihringten mi chakte chhang chu an ei a; Puarna khawpin chaw a rawn pe a.

²⁶Khawchhak thli chu vânah a tlehtîr a; A thiltihtheihnain chhim thli chu a hruai a.

²⁷Sa chu vaivut zât laiin an chungah a sûrtîr a, Sava thla nei chu tuifinriata ṭiau vaivut zât laiin;

²⁸An riahhmun laiah a tlâktîr a, An awmna bûk kiang vêlahte chuan.

²⁹Chutichuan, an ei a, an puar hle a; An châk chu a pe ta a ni.

³⁰An châk a la reh lo va, An chaw chu an kâah a la awm a.

³¹Chumi lai tak chuan Pathian thinurna chu an chungah a chho va, An mi nalh nalh ṭhenkhat a that a, Israel tlangvâlte chu a vaw thlu hlawm a.

³²Chuti chung pawhin thil an la tisual ta cheu va, A thil mak tihte chu an ring chuang lo.

³³Chuvângin, an dam chhûng nite chu engmahlo ang maiin a tihralsak a, An dam chhûng kumte chu hlauhnain a tihralsak bawk a.

³⁴Anmahni a thah apiangin amah chu an zawng ṭhîn a. An kîr leh a, zîng takah Pathian an zawng ṭhîn a.

³⁵Pathian chu an lungpui a ni tih leh, Pathian Chungnungbera chu an tlantu a ni tih an hre chhuak ṭhîn.

³⁶Nimahsela, amah chu an kâin an fak der a, An leiin a hnênah dâwt thu an sawi ṭhîn.

³⁷An thinlung chu a lakah a dik si lo va, A thuthlungah chuan an rinawm hek lo.

³⁸Nimahsela, ani chu lainatnaa a khah avângin an khawlohna chu a ngaidam a, anni chu a tiboral lo; A ni, vawi tam tak a thinurna chu a la kîr a, A thinrimna chu a zain a chawk tho duh ṭhîn lo.

³⁹Tisa chauh an ni tih a hre reng a; Thli, lêt leh lo tûra tleh liam ṭhîn ang hi.

⁴⁰Thlalêrah khân a chungah an va hel zingin, Ram rovah khân amah chu an va tilungngai zing êm!

⁴¹Hawi kîr lehin Pathian an fiah a, Israel-ho Mi Thianghlima chu an tivui ṭhîn.

⁴²A kut chu an hre reng lo va, Dotu laka a chhanhim ni chu an hre reng ṭhîn hek lo.

⁴³Aigupta ramah a chhinchhiahnate a dah a, Zoan phûlah a thil makte a dah bawk a;

⁴⁴An luipuite leh an luitête chu thisenah a chantîr a; Tichuan, an in thei ta lo va.

⁴⁵An zîngah tho tam tak a tîr a, chûng chuan anmahni a ei zo va; Chungûte a tîr bawk a, chûng chuan anmahni a tiboral ta a.

⁴⁶An thil ṭote pawh chu pangang a pe a, An thawh rim rah chu khaukhuap a pe bawk a.

⁴⁷An grêp hruite chu rialin a tithi a, An theipui kûngte pawh chu vûrin a tithi bawk a.

⁴⁸An rante pawh chu rial a pe a, An ran rualte chu ṭêk sa tak a pe bawk a.

⁴⁹A thinur nasa tak chu an chungah a thlâk a, Thinrimna te, lungnih loh êm êmna te, manganna te, Thil ṭha lo tak thlentu tirhkoh pâwl te chu.

⁵⁰A thinurna atân chuan kawng a siamsak a, An nunna chu thihna lakah a hum lo va, An nun chu hri a pe ta zâwk a;

⁵¹Aigupta rama fa tîr awm zawng zawng a tihlum a, Hama puan intea an chakna rah hmasa berte chu.

⁵²Nimahsela, ama mite chu berâm angin a hruai chhuak a, Ran rual angin thlalêrah khân a hruai a.

⁵³Him takin a hruai a; chutichuan, eng mah an hlau lo va; Nimahsela, tuifinriat chuan an hmêlmate chu a khuh zo ta a.

⁵⁴Tin, a hmun thianghlim ramri chu a hruai thleng a, He tlâng, a kut ding lama a leia hi.

⁵⁵Hnam tin chu an hmaah a hnawt chhuak a, Anni chu hruia tehin ro chan atân a sem a, An puan inahte chuan Israel hnamte chu a awmtîr ta a.

⁵⁶Nimahsela, Pathian Chungnungbera chu an fiah a, a chungah an hel a, A thuhriattîrte chu an zâwm si lo va.

⁵⁷Hawi kîrin, an thlahtute angin vervêk takin an ti ta zâwk a; Thal ngul rinawm lo angin an kal kawi a.

⁵⁸An hmun sângtein amah chu an tithinur si a, An milem siamtein an thîktîr bawk a.

⁵⁹Pathianin chu chu a lo hriatin a thin a rim a, Israel-ho chu a ten ta êm êm a;

⁶⁰Chutichuan, Silo biakbûk, Mihring zînga a puan in dah chu a kalsan a;

⁶¹A chakna chu salah a mantîr a, A ropuina chu dotu kutah a mantîr ta bawk a.

⁶²A mite chu khandaih hnênah a pe a; A ro chan chungah chuan a thin a rim ta a.

⁶³Meiin an tlangvâlte chu a kâng ral a, An nulate chuan inneihna hla rêng rêng an nei ta lo.

⁶⁴An puithiamte chu khandaiha tihtlûkin an awm a; An hmeithaite chu ṭah rêng rêng an ṭap lo.

⁶⁵Chutih lai chuan LALPA chu, mi an muhîl an harh angin a harh ta a, Mi chak uain vânga au ang hian.

⁶⁶Amah dotute chu a vaw kîr a, Kumkhaw hmingchhiatna a hlawhtîr ta a.

⁶⁷Chu lo pawh chu Josefa puan in chu a duh lo va, Ephraim hnam chu a thlang lo bawk a;

⁶⁸Juda hnam chu a thlang ta zâwk a, A hmangaih Zion tlâng chu.

⁶⁹A in thianghlim chu vân sângte ang khian a sa a, Kumkhua atâna a tihngheh leilung ang hian.

⁷⁰A chhiahhlawh Davida chu a thlang a, Berâm huang ata te chu a la chhuak a;

⁷¹Berâmpui no hruaite zuitu aṭangin a hruai chhuak a, A mite, Jakob-ho leh a ro chan Israel-ho châwm tûrin.

⁷²Chutichuan, ani chuan a thinlung ṭhatna ang zêlin anniho chu a châwm a; A kut thiamnain a hruai ta a.