Read Mizo_Old_version Sam 79 Bible Online

Sam 79 - Mizo_Old_version bible

Sam 79

¹Aw Pathian, hnam tin i ro chanah hian an lût a; I biak in thianghlim hi an tibawlhhlawh a; Jerusalem hi lung chim khâwmah an siam ta thluah a.

²I chhiahhlawhte ruang chu chunglêng savate chawah an pe a, I mi thianghlimte sa chu ramsate an pe a.

³An thisen chu Jerusalem vêlah hian tui angin an leihbua a; Anmahni phûmtu tûr lah tu mah an awm si lo.

⁴Kan vêla mite sawichhiatin kan lo awm a, Kan dep vêla mite hmuhsit leh nuihsanin kan lo awm ta.

⁵Aw LALPA, i thinur kumkhua dâwn em ni? I thîkna chu mei angin a alh dâwn em ni?

⁶Nangmah hre lo hnam tin chungah hian i thinur chu leihbua ang che, I hming lam lo ram chungahte pawh.

⁷Jakob-ho chu an ei zo va, An awmna chu an tiram ta si a.

⁸Min thlahtute khawlohnate kha kan lakah chuan hre reng suh ang che! I lainatnate chuan min hmuak thuai rawh se, Nasa taka tihhniamin kan awm ta si a.

⁹Aw, min chhandamtu Pathian, i hming ropui nân min ṭanpui la; I hming avângin min chhanhim la, kan sualte hi tlêng fai ang che.

¹⁰Engati nge hnam tinin, “Khawiah nge an Pathian kha le?” an tih ni? I chhiahhlawhte thisen chhuak phuba lâkna chu kan mit hmuhah hnam tin zîngah hian hriat ni rawh se.

¹¹Mi tâng rûm chu i hmaah thleng rawh se; I thiltihtheihna nasat avângin thi tûra ruatte chu humhim la;

¹²Aw LALPA, nangmah an sawichhiatna che kha, Kan vêla mite hi an ângchhûngah a lêt sarihin rûl leh ang che.

¹³Chutichuan, keini i mite, i ran tlatna hmuna berâmte hian, Kumkhuain lâwm thu kan hrilh ang chia; Chhuan zawng zawng thlengin nangmah fakna chu kan hriattîr zêl ang.