Read Mizo_Old_version Sam 8 Bible Online

Sam 8 - Mizo_Old_version bible

Sam 8

¹Aw LALPA, kan Lalpa, Lei chung zawng zawngah hian i hming chu a va ṭha êm! I ropuina chu vân chungahte khian i dah a.

²Hmêlma leh phuba latu tihdaihna tûrin, Nangmah dotute avângin Nausênte leh hnute hne laite kâa chhuak chuan chakna i tinghet a.

³I vân, i kutchhuakte, Thla leh arsi i ruathote khi, ka ngaihtuah châng chuan,

⁴“Mihring hi eng nge maw a niha, i hriat reng ṭhin ni? Mihring fapa pawh hi eng nge maw a niha, i kan ṭhin ni?” ka ti ṭhîn.

⁵Ani chu Pathian aia hnuai deuh chauhvin i siam a, Ropuina leh chawimawina i khumtîr si a.

⁶I kutchhuak chungahte hian thu i neihtîr a; A ke hnuaiahte engkim i dah a:

⁷Berâm leh bâwng zawng zawngte nên, A ni, ramsate nên pawh;

⁸Chunglêng sava leh tuifinriat sangha, Tuifinriat kawnga kal apiangte nên.

⁹Aw LALPA, kan LALPA, Lei chung zawng zawngah hian i hming a va ṭha êm!