Read Mizo_Old_version Sam 80 Bible Online

Sam 80 - Mizo_Old_version bible

Sam 80

¹Aw, Israel-ho Vêngtu, Berâm pâwl anga Josef-ho hruaitu, beng lo chhi ang che; Nang cherub-te chunga ṭhua chu, lo êng chhuak ang che.

²Ephraim-ho leh Benjamin-ho leh Manase-ho mit hmuhah chuan i chakna kha chawk tho la, Min chhandam tûrin lo kal ang che.

³Aw Pathian, min hawi kîrtîr leh la; I hmêl kha tiêng ang che; tichuan, chhandamin kan awm dâwn nia.

⁴Aw LALPA, sipaihote Pathian, Eng chen nge i mite ṭawngṭaina chungah hian i thinur dâwn le?

⁵Anni chu mittui chhangin i châwm a, Mittui hi in tûrin tehna lian takin i pe ṭhîn.

⁶Nangin kan vêla mite tân inhnialnaah min siam ṭhîn a, Min dotute chu an nui tlâng ṭhîn.

⁷Aw, sipaihote Pathian, min hawi kîrtîr leh la; I hmêl kha tiêng ang che; tichuan, chhandamin kan awm dâwn nia.

⁸Aigupta ram ata grêp hrui i rawn la a; Hnam tin chu i hnawt chhuak a, i phun ta a.

⁹A hma i tifai zêl a, Thûk takin zung a kai a, ram chu a awh ta vek a.

¹⁰Tlângte chu a hlima tuamin a awm hlawm a, A pêngte chu Pathian sidar thingte ang mai a ni.

¹¹A ṭangte chu tuifinriat thlengin a zâm chhuahtîr a, A chawrnote chu Luipui thlengin.

¹²Engati nge a palte chu i tihchhiat ni? Kawnga kal apiangin an pawh thlâk tâk hi.

¹³Ramhnuaia sanghal chuan a tichhia a, Ramsate pawhin an tlân ṭhîn.

¹⁴Aw, sipaihote Pathian, khawngaih takin hawi kîr leh ang che; Vân aṭang khân rawn en chhuk la, he grêp hrui hi en la, rawn kan ang che.

¹⁵A kûng i kut ding lamin a phun leh, A pêng i tâna i tihkhauh nên hian.

¹⁶Meiah a kâng ta, kihin a awm ta; I hmêla zilhhauna avângin an boral ṭhîn.

¹⁷I kut kha i ding lama mi chungah awm rawh se, Mihring fapa, i tâna i tihchaka chungah hian.

¹⁸Chutichuan, kan kîrsan lo vang che; Min tiharh la; tichuan, i hming kan lam dâwn nia.

¹⁹Aw LALPA, sipaihote Pathian, min hawi kîrtîr leh la; I hmêl kha tiêng ang che; tichuan, chhandamin kan awm dâwn nia.