Read Mizo_Old_version Sam 81 Bible Online

Sam 81 - Mizo_Old_version bible

Sam 81

¹Pathian min tichaktu chawimawiin hlim takin zai ula; Jakob-ho Pathian chawimawiin hlim takin au rawh u.

²Fakna hla sa ula, khuangtê te, Ṭingṭang ngaihnawm tak te, perhkhuang te nên rawn keng rawh u.

³Thla tharah chuan tawtawrâwt hâm ula, thla hlei ngaa kan kût niah nên.

⁴Chu chu Israel-ho tâna thuruat a ni si a, Jakob-ho Pathian dân a ni.

⁵Chu chu Josef-ho zînga thu hriattîr nân a ruat a ni, Aigupta ram aṭanga a kal chhuah lai khân; Ṭawng ka la hriat loh ka hriat kha.

⁶An koki chu thil rit aṭangin ka la sawn a; An kutte chu kho ka thlahtîr a.

⁷Manganin mi ko va, ka chhanhim che u a; Khawpui ri bihrûkna hmunah khân ka chhâng che u a; Meriba tuiahte khân ka fiah che u kha. (Selah)

⁸Aw, ka mite u, ngaithla ula, ka hriattîr ang che u; Aw Israel-hote u, ka thu ngaithla duh teh ula aw!

⁹Ram dang pathian rêng rêng chu in zîngah a awm tûr a ni lo va; Mi dang pathian rêng rêng chu in be tûr a ni hek lo.

¹⁰Kei hi LALPA in Pathian chu ka ni, Aigupta ram ata hruai chhotu che u kha; In kâ âng zau ula, ka tikhat dâwn nia.

¹¹Nimahsela, ka mite chuan ka aw an ngaithla si lo va; Israel-ho chuan mi duh loh kha.

¹²Tichuan, an thinlung sak vângin ka thlahthlam a, An duh ang anga awm tûrin.

¹³Aw, ka mite hian ka thu ngaithlain, Israel-ho hi ka kawngahte hian kal sela chu aw!

¹⁴An hmêlmate chu ka titlâwm thuaiin, Anmahni dotute chungah chuan ka kut ka lek tûr.

¹⁵ LALPA hawtute chu a hmaah khûrin an kûn ang a; Kumkhuain hrem an tuar ang.

¹⁶Nangni chu buhchangrumin ka châwm ang che u a, Lungpuia khawizûin ka titlai ang che u.