Read Mizo_Old_version Sam 83 Bible Online

Sam 83 - Mizo_Old_version bible

Sam 83

¹Aw Pathian, ṭawng lovin awm suh ang che; Aw Pathian, ngawi reng suh la, awm hle hle lul suh ang che.

²Ngai teh, nangmah dotute chu an sa mur mur a; Nangmah hawtute chu an dâk hraw hraw a.

³I mite hi vervêk takin an phiar a, I mi thuhrûkte chungah hian a chhe lamin an inrâwn hlawm a.

⁴“Hawh u, an hnam hloh khawpin i tiboral ang u! Israel-ho hming rêng rêng hi hriat renga a awm tawh lohna tûrin,” an ti a.

⁵Thu khat vuain an inrâwn a; I chungah a chhe lama ti tûrin thu an intiam hlawm a.

⁶Edom-ho leh Ismael-ho puan inte, Moab-ho leh Hagar-hote;

⁷Gebal-ho leh Amon-ho leh Amalek-hote; Philistia-ho Tura khuaa awmte nên;

⁸Assuria-ho pawh an lamah an ṭang ve a; Lota thlahte chu an ṭanpui a. (Selah)

⁹Anniho chu Midian-ho chunga i tih ang te, Kison luia Sisera chunga i tih ang te, Jabina chunga i tih ang te khân ti ve ang che;

¹⁰Chu mite chu En-dor khuaah an boral a; Lei tân êkdûr ang mai an lo nih tâk kha.

¹¹An mi liante chu Oreba leh Zeeba ang khân siam la, A ni, an lal zawng zawngte chu Zeba leh Zalmuna ang khân siam ang che.

¹²Chu mite chuan, “Pathian awmnate chu I luahsak ang u,” an tih kha.

¹³Aw ka Pathian, anniho chu vaivut vir chung chung ang hian siam ang che; Buh sisawp thli chhêm lên ur ur ang mai hian.

¹⁴Ram kângtu mei ang leh, Tlâng kângtu meialh ang hian;

¹⁵Anni chu i thlipuiin ûm la, I thli na takin tihlau ang che.

¹⁶Aw LALPA, i hming an zawn theih nân An hmêl chu zahnain tikhat ang che.

¹⁷Kumkhuain mualpho leh mangang takin awm sela; A ni, tihzaha awmin boral rawh se;

¹⁸Nangmah chauh hi JEHOVA hming pu, Leilung zawng zawng chunga Chungnungber i nih an hriat theih nân.