Read Mizo_Old_version Sam 85 Bible Online

Sam 85 - Mizo_Old_version bible

Sam 85

¹ LALPA, i ram chungah hian i lâwm a; Jakob-ho sala an awm chu i hruai kîr leh ta a.

²I mite khawlohnate i ngaidam a, An sualna zawng zawng i khuh zo ta a. (Selah)

³I thinrimna zawng zawng chu i la bo va; I thinurna nasa tak chu i hawisan ta a.

⁴Aw, min chhandamtu Pathian, min hawi kîrtîr la, Kan chunga i thinurna chu tibâng ang che.

⁵Kan chungah i thinur kumkhua dâwn em ni le? I thinur chu chhuan zawng zawng thlengin i lantîr zêl dâwn em ni?

⁶Nangmahah chuan i mite an hlim theih nân Min tiharh leh dâwn lâwm ni?

⁷Aw LALPA, i ngilneihna chu min hmuhtîr la, I chhandamna chu min pe bawk ang che.

⁸Pathian, LALPA thu sawi tûr chu ka ngaithla ang; A mite leh a mi thianghlimte hnênah thlamuanna thu a sawi dâwn si a; Nimahsela, anni chu âtna lamah hawi leh tawh suh se.

⁹A chhandamna chu amah ṭihtute hnaihah chuan a awm ngei ngei ṭhîn a ni; Kan ramah hian ropuina a awm theih nân.

¹⁰Ngilneihna leh thutak an intâwk a; Felna leh remna an infâwp a.

¹¹Thutak chu lei aṭangin a chawr chhuak a; Felna chuan vân aṭangin a rawn en chhuk ta a.

¹²A ni, LALPA chuan thil ṭha a pe ang a; Kan ram hian a thil ṭo chu a pe bawk ang.

¹³Felna chuan a hma a hruai ang a, A hniakte chu kawngah a siam ang.