Read Mizo_Old_version Sam 86 Bible Online

Sam 86 - Mizo_Old_version bible

Sam 86

¹Aw LALPA, ka lamah hian i beng rawn dawh la, mi chhâng ang che; Rethei leh pachhe tak ka nih hi.

²Ka nunna hi vawng ṭha ang che; Pathian ngaihsak mi ka ni si a; Aw, nang ka Pathian, nangmah ringtu, i chhiahhlawh hi chhandam ang che.

³Aw LALPA, mi khawngaih ang che, Nilêngin ka au si ṭhîn chia.

⁴I chhiahhlawh nunna hi tihlim ang che; Aw LALPA, ka rilru hi i hnênah ka dah tlat si ṭhîn a.

⁵ LALPA, nang chu i ṭha a, ngaihdam i peih a, A kotu che apiang chungah ngilneihna i ngah si ṭhîn a.

⁶Aw LALPA, ka ṭawngṭainaah hian beng lo chhi la; Khawngaih ka dîlna aw hi ngaithla ang che.

⁷Ka mangan ni chuan ka ko vang che; Nangin mi chhâng dâwn si a.

⁸Aw LALPA, pathiante zîngah nang ang rêng rêng an awm lo va, I thiltihte ang hi thiltih rêng rêng a awm hek lo.

⁹Aw LALPA, i siam hnam tinrêngte chu an lo kal ang a, i hmaah an lo kûn ang a; I hming chu an rawn chawimawi ang.

¹⁰Nang chu i ropui si a, thil makte i ti bawk ṭhîn a; Nangmah chauh hi Pathian i ni.

¹¹Aw LALPA, i kawng chu mi entîr ang che; i thutakah ka awm ang; I hming ṭih tûrin thinlung sakhat mi puttîr ang che.

¹²Aw LALPA ka Pathian, ka thinlung zawng zawngin ka fak ang chia; I hming hi kumkhuain ka chawimawi ang.

¹³Ka chunga i ngilneihna chu a nasain, Ka nunna hi khuarkhurum hnuaihnung ber ata i chhanhim si a.

¹⁴Aw Pathian, mi chapote chuan mi bei a, Mi nunrâwng awm khâwmte chuan ka nunna hi tihbo tumin an zawng a, nang chu an hmaah an dah ṭhîn lo che.

¹⁵Nimahsela, aw LALPA, nang chu Pathian, lainatnaa khat, mi khawngaih thei, Thinnel, ngilneihna leh thutak ngah i ni.

¹⁶Aw, ka lam lo hawi la, mi khawngaih ang che; I chhiahhlawh hi i chakna pe la. I bawihnu fa hi chhandam ang che.

¹⁷Mi duhsakna chu lantîr ang che; Mi hawtute chuan chu chu an hmuha an mualphona tûrin; LALPA, nangin mi ṭanpui a, mi thlamuan si a.