Read Mizo_Old_version Sam 88 Bible Online

Sam 88 - Mizo_Old_version bible

Sam 88

¹Aw LALPA, mi chhandamtu Pathian, A chhûn a zânin i hmaah ka au ṭhîn.

²Ka ṭawngṭaina hi i hnên thleng sela; Ka au thâwmah hian i beng rawn dawh ang che.

³Ka nunna hi mangannatein a khat a, Ka nun hian Seol chu a rawn hnaih ta si a.

⁴Khuarkhuruma chhukte zînga chhiar tel ka ni a; Chakna rêng rêng nei lo mi ang ka ni:

⁵Râl thahho thlâna mute anga mitthi zînga paih thlâk ka ni; Chûngte chu i hriat tawh loh, I kut ata tihboral an ni.

⁶Khuarkhurum hnuaihnung berah mi muttîr ta a, Hmun thim tak, thûk takahte chuan.

⁷I thinrimna chuan mi delh tlat a, Nangin i tuifâwn zawng zawngin mi tihrehawm ta a. (Selah)

⁸Ka hmêlhriatte chu mi hlatah i awmtîr a; An tâna tenawm takah mi siam ta a; Khârkhipin ka awm a, ka chhuak thei lo a ni.

⁹Hrehawmna avângin ka mit a chhe telh telh a: Aw LALPA, ni tin ka ko chia, I lamah ka kutte ka phar a.

¹⁰Mitthite tân chuan thil mak i ti dâwn em ni? Thi tawhte chuan thovin an fak dâwn che em ni? (Selah)

¹¹I ngilneihzia chu thlânah hriattîrin, I rinawmzia chu Boralna Hmunah hriattîrin a awm dâwn em ni?

¹²I thil mak tihte chu thimah hriatin a awm dâwn em ni? I felna chu theihnghilhna ramah hriatin a awm bawk dâwn em ni?

¹³Aw LALPA, kei erawh chuan ka au chia, Ka ṭawngṭaina chuan zîngah a hmuak ang che.

¹⁴ LALPA, engati nge ka nunna hi i thlauhthlâk le? Engati nge ka lakah i hmai i thup ni?

¹⁵Ka naupan têt ata hrehawm tuar leh thi lek lekin ka awm thîn a; I thil râpthlâk takte ka tuarin ka thauvah mi man ṭhîn.

¹⁶I thinrim nasa tak chuan mi vûr pil a; I thil râpthlâk takte chuan mi tiboral ta a.

¹⁷Chûng chuan nilêngin tui angin mi vêl a, Mi hual vêl hlawm a.

¹⁸Mi hmangaihtu leh ka ṭhian chu mi hlatah i awmtîr ta a, Ka hmêlhriatte chu thimah i awmtîr ta bawk a.