Read Mizo_Old_version Sam 89 Bible Online

Sam 89 - Mizo_Old_version bible

Sam 89

¹ LALPA ngilneihna thute chu kumkhuain hlaah ka sa ang a; Ka kain i rinawmzia chu chhuan zawng zawng thlengin ka hriattîr ang.

²“Ngilneihna chu kumkhua atân rem chhohvin a awm ang; I rinawmna chu vânahte ngei khian i tinghet ang,” ka ti ta a ni.

³Ka mi thlan hnênah chuan thu ka thlung a, Ka chhiahhlawh Davida hnênah chhia ka chham ta a;

⁴“I thlahte chu kumkhua atân ka tinghet ang a, I lalṭhutphah pawh chhuan zawng zawng thlengin ka rem chho vang,” tiin. (Selah)

⁵Aw LALPA, vânte khian i thil mak tih hi an fak ang a; Mi thianghlimte inkhâwmnaah khian i rinawmna hi an fak bawk ang.

⁶Vân dumahte khian LALPA nêna tehkhin theih tu nge awm ni? Mi thiltithei tak fate zîngah khian LALPA ang,

⁷Mi thianghlimte inrâwn khâwmnaah Pathian hlauhawm tak, A kiang vêla mi zawng zawng aia ṭih ber tûr chu, tu nge awm ni?

⁸Aw LALPA, sipaihote Pathian, Aw JAA, nang anga mi chak tu nge awm? I rinawmna chu i vêlah a awm si a.

⁹Nang chuan tuifinriat chapona chungah ro i rêl ṭhîn a; A tuifâwn invawrh laite chu i tireh ṭhîn.

¹⁰Nang chuan Rahab chu râl thah angin i tikeh sawm a; Nangmah dotute chu i bân tha chakin i tidarh ta a.

¹¹Vânte khi i ta a ni a, lei pawh hi i ta a ni; Khawvêl leh a chhûnga thil awm zawng zawng hi nangma din a ni.

¹²Chhim leh hmâr chu nangma siam a ni a; Tabor leh Hermon chu i hming avângin hlimin an zai ṭhîn.

¹³Nang chuan bân thiltithei tak i nei a; I kut chu a chak a, i kut ding lam chu chawimawiin a awm a.

¹⁴Felna leh rorêlna fel chu i lalṭhutphah nghahchhan a ni a: Ngilneihna leh thutak chu i hmaah an kal ṭhîn.

¹⁵Thâwm hlimawm hre ṭhîn hnam chu an eng a thâwl e! Aw LALPA, anni chu i hmêl êngah an awm ṭhîn.

¹⁶I hming avângin nilêngin an hlim ṭhîn a, I felna avângin chawimawiin an awm ṭhîn.

¹⁷Nang chu an chakna ropuina i ni si a, I duhsakna avângin kan ki hi chawimawiin a awm ang.

¹⁸Kan phaw hi LALPA ta a ni si a; Kan lal hi Israel-ho Mi Thianghlima ta a ni.

¹⁹Chumi lai chuan i mi thianghlimte hnênah inlârnaah thu i sawi a, “Mi pakhat chak tak chungah chuan ṭanpuina ka nghat a; Mi pakhat, mite zînga thlan chhuah chu ka chawimawi ta a.

²⁰Ka chhiahhlawh Davida chu ka chhar a; Ka hriak thianghlim chu amah chu ka thih ta a:

²¹Ka kut hi a hnênah tihnghehin a awm ang a; Ka bân hian ani chu a tichak ang.

²²Hmêlma chuan a ngam lo vang a; Mi sual chuan a titlâwm hek lo vang,

²³Amah dotute chu a hmaah ka vaw thlu ang a, Amah hawtute chu ka sawisa ang.

²⁴Ani hnênah erawh chuan ka rinawmna leh ka ngilneihna chu a awm ang a; Ka hming avângin a ki chu chawimawiin a awm bawk ang.

²⁵A kut chu tuifinriatah chuan ka nghahtîr ang a, A kut ding lam chu luipuiahte chuan.

²⁶Ani chuan, ‘Nang chu ka Pa, Ka Pathian, ka inchhandamna lungpui i ni,’ tiin mi au vang.

²⁷Tin, keiin ani chu fa tîrah ka siam ang a, Leia lalte zînga chungnung berah ka siam ang.

²⁸Ka ngilneihna chu kumkhuain a tân ka vawn ṭhatsak ang a, Ka thuthlun chu a hnênah a awm nghet ang.

²⁹A chi thlahte chu kumkhuain ka awmtîr ang a, A lalṭhutphah chu vân awm chhûng ni chenin ka awmtîr bawk ang.

³⁰“A fate chuan ka dân hi an hawisana, Ka rorêlnate anga an awm lohva,

³¹Ka thuruat an bawhchhiata, Ka thupêkte an vawn ṭhat loh chuan,

³²An bawhchhiatnate chu tiangin ka rawn kan ang a, An khawlohnate chu vuakin ka rawn kan ang.

³³Nimahsela, ka ngilneihna chu a hnên ata ka lâksak vek lo vang a, Ka rinawmna chu dâwta chan ka phal hek lo vang.

³⁴Ka thuthlung chu ka bawhchhe lo vang a, Ka hmuia thu chhuak chu ka tidanglam hek lo vang.

³⁵“Vawi khat ka thianghlimna chhâlin chhia ka chham a; Davida hnênah dâwt ka sawi lo vang;

³⁶A chi thlahte chu kumkhuain an awm ang a, A lalṭhutphah chu ka hmaah ni angin a awm bawk ang.

³⁷Thla angin kumkhua atân tihnghehin a awm ang a, Vân duma hretu rinawm ang khian,” i ti a. (Selah)

³⁸Nimahsela, nang chuan i thlauthlain i duh lo va, I hriak thiha chungah chuan i thin a rim ta a.

³⁹I chhiahhlawh thuthlun chu i ten a, A lallukhum chu leia paih thla hialin i titlâwm ta a.

⁴⁰A dai zawng zawng chu i titlu a; A kulhbîngte chu i tichhe ta a.

⁴¹Kawnga kal apiangin a thil an lâksak ṭhîn a; A vêla mite sawichhiatin a lo awm ta a.

⁴²Amah dotute kut ding lam chu i chawimawi a; A hmêlma zawng zawngte chu i tihlim ta a.

⁴³A ni, a khandaih hma chu i bêng per a, Ani chu inbeihnaah chuan i din nghehtîr ta lo va.

⁴⁴A ênna chu i tihrehsak a, A lalṭhutphah chu leiah i paih thla ta a.

⁴⁵A tlangvâl lai nite chu i tihtawisak a; Ani chu mualphonain i khuh ta si a. (Selah)

⁴⁶Aw LALPA, i biru kumkhua dâwn em ni? Eng chen nge i thinrim chu mei anga a alh dâwn le?

⁴⁷Aw, ka hun hi a tawi tûrzia hre reng la: Mihring fate zawng zawng hi i va siam engmahlo êm!

⁴⁸Eng mi nge thih ni hmêl hmu lova nunga, Seol kut aṭanga a nunna chhanhim tûr chu? (Selah)

⁴⁹ LALPA, i hmânlai khawngaihna, i rinawmnaa Davida hnêna chhechhama i tiamte kha, Khawiah nge a awm tâk?

⁵⁰ LALPA, i chhiahhlawhte an sawichhiatna hi hre reng ang che; Hnam chak takte zawng zawng sawichhiatna ka ângchhûnga ka tuar ṭhinzia hi;

⁵¹Aw LALPA, nangmah dotute sawichhiatna, I hriakthiha hniakte sawichhiatna chu.

⁵² LALPA chu kumkhuain fakin awm rawh se. Amen. Amen.