Read Mizo_Old_version Sam 9 Bible Online

Sam 9 - Mizo_Old_version bible

Sam 9

¹ LALPA hnênah chuan ka thinlung zawng zawngin lâwm thu ka sawi ang a; I thil mak tih zawng zawng chu ka hriattîr ang.

²Nangmahah chuan ka lâwmin ka hlim ang a; Aw, nang Chungnungber, i hming fakin ka zai ang.

³Mi dotute chu an tlânchhiat veleh, I hmaah chuan an petek a, an boral a ni.

⁴Ka tâna âwm rêngah leh ka thu-ah hian nangin mi ṭan si a; Fel taka rorêlin lalṭhutphahah chuan i ṭhu a.

⁵Hnam tin i zilhhau va, mi suaksualte chu i tiboral a, An hming chu kumkhaw tlaitluan atân i thai bo ta a.

⁶Dotute chu an mang zo va, kumkhua atân eng mah nei lovin an awm ta; I khaw tihṭiau tawhte chu, Anmahni hriat rengna lamin a boral ta bawk a.

⁷ LALPA erawh chu kumkhua atân lalah a ṭhu a; A lalṭhutphah chu rorêlna tûrin a buatsaih ta.

⁸Ani chuan khawvêl hi fel takin ro a rêlsak ang a, Thlei bîk nei lovin mi tin ro chu a rêl ang.

⁹Chutichuan, LALPA chu hnehchhiahna tuarte tân chuan kulhbîng sâng a lo ni ang a; Mangan hunahte chuan kulhbîng sâng a lo ni ang;

¹⁰Tichuan, i hming hretute chuan an ring ang che; Nang zawngin LALPA, nangmah zawngtute chu i kalsan ngai si lo.

¹¹ LALPA, Zion-a awm chu fakin zai ula; Mite zîngah chuan a thiltihte chu hril rawh u.

¹²Thisen chhuah chhuahchhâl ṭhîntu chuan anni chu a hre reng si ṭhîn a: Mi retheite au thâwm a theihnghilh ngai lo.

¹³Aw LALPA, mi khawngaih la; Thihna kawngkhâr ata mi kai chhuak ṭhîntu, Mi hawtute avânga ka manganna hi en teh;

¹⁴Nangmah fakna zawng zawng chu ka hriattîr theihna tûrin; Zion fanu kawngkaahte chuan. I mi chhandamnaah hian ka hlim ang.

¹⁵Hnam tin chu an khuarkhurum siamah chuan an pil a; An lên phah rûkah chuan anmahni ke ngei a âwk ta a.

¹⁶ LALPA chu a inhriattîr a, ro a rêl ta a; Mi suaksual chu ama kutchhuak ngeiah chuan a âwk ṭhîn a. (Higgaion. Selah)

¹⁷Mi suaksualte chu Seol-ah an kîr leh ang, Hnam tin, Pathian theihnghilh hmang zawngte nên chuan.

¹⁸Pachhiate chu theihnghilhin an awm fo lo vang a, Retheite beiseina chu kumkhua chuan a bo hek lo vang.

¹⁹Aw LALPA, tho teh; mihring maiin ngam che suh se. Hnam tin chu i mit hmuhah rorêlsakin awm rawh se.

²⁰Aw LALPA, anni chu tihlau la; Hnam tinin mihring mai an ni tih inhre rawh se. (Selah)