Read Mizo_Old_version Sam 91 Bible Online

Sam 91 - Mizo_Old_version bible

Sam 91

¹Chungnungbera bihrûkna hmuna awma chu, Engkimtitheia hlimah chuan a awm reng ang.

² LALPA chungthuah chuan, “Ani chu ka inhumhimna leh ka kulhpui a ni a; Ka Pathian, ka rina chu a ni,” ka ti ang.

³Ani chuan thangkamtu thang lakah leh Hri ṭha lo tak lakah chuan a chhanhim dâwn che a ni.

⁴A thlain a khuh ang chia, A thla hnuaiah chuan i tlu lût ang; A thutak chu phaw tê leh phaw lian a ni.

⁵Zâna thil râpthlâk chu i hlau lo vang a, Chhûna thal lo lêng ṭhîn chu i hlau hek lo vang;

⁶Thim hnuaia hri lêng ṭhîn chu i hlau lo vang a, Chhûn laia thil tichhe ṭhîn chhiatna chu i hlau hek lo vang.

⁷I sîrah sâng an tlu ang a, I ding lamah sîng an tlu bawk ang; Nimahsela, nang chu a hnaih lo vang che.

⁸I mitin i en ang a, Mi suaksualte rulhna chu a hmuhin i hmu chauh vang.

⁹Aw LALPA, nang chu ka inhumhimna i ni si! Chungnungbera chu i awm nân i hmang a;

¹⁰Thil ṭha lo rêng rêngin a tawk lo vang chia, Hri rêng rêng pawhin i puan in chu a rawn hnaih hek lo vang.

¹¹I kawng tinrênga humhim tûr chein, I chungthuah zawng a vântirhkohte chu thu a pe dâwn si a.

¹²An kutin an dâwm ang chia; Chuti lo chuan, i kein lung i chhuih dah ang e.

¹³Sakeibaknei leh rûlrial chu i rap ang a, Sakeibaknei vânglai leh rûlpui chu i chîl nek ang.

¹⁴Ka chungah a hmangaihna a nghah tlat avângin ka chhanhim ang a, Ka hming a hriat avângin hmun sângah ka hlâng ang.

¹⁵Ani chuan mi ko vang a; tichuan, ka chhâng ang; Kei chu a mangan lai chuan a hnênah ka awm ang a; Amah chu ka chhanhimin ka chawimawi ang.

¹⁶Dam reinain ka tilungawi ang a, Ka chhandamna chu ka hmuhtîr bawk ang.