Read Mizo_Old_version Sam 94 Bible Online

Sam 94 - Mizo_Old_version bible

Sam 94

¹Aw LALPA, nang phuba lâkna thu neitu Pathian, Nang phuba lâkna thu neitu Pathian, êng chhuak ang che.

²Nang leia rorêltu, thawk la; Chapote chu an sual man rûl ang che.

³ LALPA, mi suaksualte chuan eng chen nge, Mi suaksualte chuan eng chen nge an ngam dâwn le?

⁴Anni chu an ṭawng mai mai a, chaltlai takin thu an sawi a; Thil tisualtute zawng zawng chu an infak chawp ṭhîn.

⁵Aw LALPA, i mite chu an tikeh sawm a, I rochan chu an tihrehawm ṭhîn.

⁶Hmeithai leh mikhual chu an tihlum a, Pa nei lo chu an that ṭhîn.

⁷“LALPAN a hmu lo vang a, Jakob-ho Pathianin a ngaihtuah hek lo vang,” an ti ṭhîn a ni.

⁸Mi zînga mi mâwlte u, ngaihtuah rawh u; Mi âte u, eng tikah nge in fin ang aw?

⁹Beng vuahtu chuan a hre lo vang em ni? Mit siamtu chuan a hmu lo vang em ni?

¹⁰Hnam tin thununtu chuan a zilhhau lo vang em ni, Mihring finna zirtîrtu chuan?

¹¹ LALPA chuan mihring ngaihtuahte chu engmahlo mai mai a ni tih a hria.

¹² LALPA, i thununna dawngtute chu an eng a thâwl e, I dân thu ata i zirtîrna dawngtute chu.

¹³Mangan ni ata i chawlhtîr dâwn si a, Mi sualte tân khuarkhurum laih zawh a nih hma chu.

¹⁴ LALPA chuan a mite a paih thla dâwn si lo va, A ro chan chu a kalsan hek lo vang.

¹⁵Rorêlna chu felna lamah a kîr leh ang a, Thinlung dik tak pu zawng zawng chuan chu chu an zui ang.

¹⁶Tu nge thil ṭha lo titute mi beihsak tûrin tho vang? Tu nge thil tisualtute mi beihsak tûrin ding ang?

¹⁷ LALPA chu mi ṭanpuitu ni suh sela chuan, Ka nunna hi rang takin hmun rehah a awm tawh ang.

¹⁸“Ka ke a tleu ve,” ka tih khân, Aw LALPA, i ngilneihna chuan mi kai a.

¹⁹Ka rilrua ngaihtuah tam tak ka neih lai chuan, I thlamuannate chuan ka nunna hi a tihlim ṭhîn.

²⁰Suahsualna lalṭhutphah, dâna thil tihsualna siam ṭhîna chuan pâwlna che a nei dâwn em ni?

²¹Mi fel nunna beih tumin an pung khâwm hlawm ṭhîn a, Thisen sawisêl bo chu thiam loh an chantîr bawk ṭhîn.

²²Nimahsela, LALPA chu ka kulhbîng sâng a lo ni a; Ka Pathian chu ka inhumhimna lungpui a lo ni.

²³Ani chuan anmahni sualna ngei chu an chungah a tlâktîr a, Anmahni ṭhat lohna ngeiah chuan a tiboral ang a; LALPA kan Pathian chuan a tiboral ang.