Read Mizo_Old_version Sam 96 Bible Online

Sam 96 - Mizo_Old_version bible

Sam 96

¹Aw, LALPA chawimawiin hla thar sa ula; Leilung luah zawng zawngte u, LALPA chawimawiin zai rawh u.

² LALPA chawimawia hla sain a hming fak ula; Ni tin a chhandamna thu chu hriattîr rawh u.

³Hnam tin zîngah a ropuizia hril ula, Mi tinrêngte zîngah a thil mak tihte chu hril rawh u.

⁴ LALPA chu a ropui a, nasa taka fak tûr a ni si a; Pathian zawng zawng aia ṭih tûr a ni.

⁵Mipuiho pathiante chu milemte an ni si a, LALPA erawh chuan vânte khi a siam a ni.

⁶Chawimawina leh ropuina a hmaah an awm a; Chakna leh mawina chu a hmun thianghlimah an awm.

⁷Mi tina chi tinrêngte u, LALPA chu pe ula, LALPA chu ropuina leh chakna pe rawh u.

⁸ LALPA chu a hming ropuina chu pe ula; Thilhlan tûr kengin a biak in hung chhûng kawtlaiahte chuan lo kal rawh u.

⁹Aw, thianghlim mawina inbelin LALPA chu chibai bûk ula; Leilung luah zawng zawngte u, a hmaah khûr rawh u.

¹⁰Hnam tin zîngah chuan, “LALPA chu lalah a ṭhu,” ti rawh u; Khawvêl pawh hi a nghîn theih lohna tûrin tihnghehin a awm a, Ani chuan thlei bîk nei lovin mi tin ro chu a rêl ang.

¹¹Vânte khi lâwm takin awm sela, lei pawh hi hlim takin awm rawh se; Tuifinriat leh a chhûnga thil awm zawng zawng hi ri hum hum rawh se.

¹²Lo leh a chhûnga awm zawng zawng hi lâwm takin awm rawh se: Chutih hunah chuan ramhnuaia thing zawng zawng hi hlimin an zai ang,

¹³ LALPA hmaah chuan; ani chu a lo kal dâwn a ni, Lei rorêl tûrin a lo kal dâwn si a; Khawvêl hi fel takin ro a rêlsak ang a, Mi tinte chu a thutakin ro a rêlsak bawk ang.